ىستىقكولدىڭ تۇبىنەن اتلانتيداعا ۇقساس كونە قالا تابىلدى
استانا. KAZINFORM - قىرعىزستاندا ىستىقكولدىڭ تۇبىنەن ارحەولوگتار اتلانتيداعا ۇقساس ەجەلگى قالانىڭ ورنىن انىقتادى. بۇل تۋرالى Kazinform اگەنتتىگىنىڭ بىشكەكتەگى مەنشىكتى ءتىلشىسى حابارلادى.
Econews مالىمەتىنشە، سۇڭگۋىرلەر مەن ارحەولوگتار سۋاستى ەكسپەديتسياسى بارىسىندا تورۋ-ايگىر ماڭىنداعى سۋ باسقان اۋماقتى زەرتتەپ، ورتاعاسىرلىق قونىستىڭ بولعانىن راستاعان.
ەكسپەديتسيا ەسەبىندە زەرتتەۋشىلەر ىستىقكول سۋىنىڭ استىندا قالعان كىرپىشتەن سالىنعان عيماراتتار مەن پەش قالدىقتارىن سيپاتتاعان. سونىمەن قاتار كەراميكا سىنىقتارى، جانۋار سۇيەكتەرى جانە مەتالدى وڭدەۋدەن قالعان شلاك قالدىقتارى تابىلعان.
عالىمدار بورپىلداق قۇم استىنان ادام ارەكەتىنىڭ ىزدەرى ساقتالعان مادەني قاباتتى - توپىراقتىڭ ەرەكشە قاباتىن انىقتاعان. بۇل ولجا ادامداردىڭ وسى اۋماقتا ۇزاق ۋاقىت بويى قۇرىلىس سالىپ، قايتا جاڭعىرتىپ وتىرعانىن، كەيىننەن بۇل جەردى سۋ باسقانىن كورسەتەدى.
قيراعان عيماراتتاردىڭ جانىنان، شامامەن 5 مەتر تەرەڭدىكتە، ارحەولوگتار XIII-XIV عاسىرلارعا جاتاتىن مۇسىلمان قورىمىن دا زەرتتەگەن. ونداعى جەرلەۋ ورىندارى ءداستۇر بويىنشا مەككە باعىتىنا قاراتىلىپ ورنالاستىرىلعان.
زەرتتەۋشىلەردىڭ نەگىزگى بولجامى بويىنشا، قالا XV عاسىرداعى كۇشتى جەر سىلكىنىسىنىڭ سالدارىنان سۋ استىندا قالعان.
