ىستىق ىقىلاس ءھام ىستىق پالاۋ: استانادا تاشكەنت مادەنيەت كۇندەرى ءوتىپ جاتىر
استانا. KAZINFORM - وزبەكستان پرەزيدەنتى شاۆكات ميرزيەيەۆتىڭ قازاقستانعا مەملەكەتتىك ساپارى اياسىندا استانادا تاشكەنت مادەنيەت كۇنىنە ارنالعان ءىس-شارالار ءوتىپ جاتىر. ەلوردا تۇرعىندارى وزبەك حالقىنىڭ مادەني باي مۇراسىمەن تانىسىپ، ۇلتتىق تاعامدارىنان ءدام تاتتى.
استانانىڭ ورتالىق ساياباعىندا ويىن-ساۋىق جانە تانىمدىق ءىس-شارالار تارتىمدى ۇيىمداستىرىلىپ، ەلوردالىقتار مەن شاھار قوناقتارى تاراپىنان جوعارى باعالانۋدا. تۇرعىندار وزدەرىن قۇددى ءبىر تاشكەنتتە جۇرگەندەي سەزىنىپ، ەكى ەل دوستىعىنىڭ ارتا بەرۋىن تىلەك ەتتى.
«وزبەكستان مەن قازاقستاننىڭ تىعىز دوستاستىعى اياسىندا استانادا قالا تۇرعىندارى مەن قوناقتارىنا ارنالعان ءىس-شارا ءوتىپ جاتىر. بۇل وقيعا ءبىزدىڭ دوستىعىمىز بەن ىنتىماقتاستىعىمىزدىڭ جارقىن ۇلگىسى بولىپ سانالادى. ءبىز قوس ەلدىڭ مادەنيەتى مەن ءداستۇرىنىڭ باي ەكەنىن كورسەتە وتىرىپ، وزبەكستان مەن قازاقستان اراسىنداعى بايلانىستى نىعايتۋعا ۇمتىلامىز»، - دەيدى حوكيمنىڭ باسپا ءسوز حاتشىسى گۇلنوزا قاسىموۆا.
سونداي-اق، تاشكەنت مادەنيەت كۇنى اياسىندا بىرنەشە بيزنەس-فورۋم، قولونەرشىلەر جارمەڭكەسى، ۇلتتىق وزبەك تاعامدارىنىڭ كورسەتىلىمىن ۇيىمداستىرىلىپ جاتىر.
ەستەرىڭىزگە سالا كەتەيىك، ءىس-شارا 9-تامىزعا دەيىن جالعاسادى.
اۆتور
ورالحان قوجانوۆ
