گيننەستىڭ رەكوردتار كىتابىنا ەنگەن قىزىل پاندا
استانا. KAZINFORM — جاپونيادا فۋتا اتىمەن تانىمال قىزىل پاندا حايۋاناتتار باعىنداعى قىزىل پاندالاردىڭ ەڭ كارىسى رەتىندە گيننەستىڭ رەكوردتار كىتابىنا ەنگىزىلدى. بۇل تۋرالى Jiji Press جازدى.
رەكورد تىركەلگەن ساتتە فۋتا 23 جاس 135 كۇندىك بولدى. ول مەكەندەيتىن تيبا حايۋاناتتار باعىندا وسى وقيعانى اتاپ ءوتۋ ءۇشىن ارنايى ءراسىم ءوتتى.
فۋتا 2003 -جىلى 5-شىلدەدە جاپونيانىڭ ورتالىعىنداعى نيحوندايرا حايۋاناتتار باعىندا تۋعان. ءبىر جىلدان كەيىن ول قازىرگى مەكەنى تيباعا اۋىستىرىلدى.
فۋتا 2005-جىلى ارتقى اياقتارىمەن تۇراتىن ەرەكشە ادەتىنىڭ ارقاسىندا تانىمال بولدى. كەيىنىرەك ءول تىپتى تەلەديدارداعى جارنامالاردا بوي كورسەتىپ ءجۇردى.
ساراپشىلاردىڭ باعالاۋىنشا، فۋتانىڭ جاسى قازىر ادام ومىرىمەن ولشەگەندە جۇزدەن اسقان. حايۋاناتتار باعىنىڭ مالىمەتى بويىنشا، كورۋ قابىلەتىنىڭ ناشارلاۋىنا جانە ەكى اياعىمەن تۇرۋ قابىلەتىنىڭ جوعالۋىنا قاراماستان، پاندانىڭ تابەتى جاقسى ءارى دەنساۋلىعى قالىپتى.
فۋتا بۇگىنگى تاڭدا پاندالار اراسىنداعى كادىمگى ءۇبىرلى- ءشۇبىرلى قاريا. نەمەرە، شوبەرە، شوپشەگى بار، ءتىپتى نەمەنەسىنىڭ ءوزى بەسەۋ.
بۇعان دەيىن قىتايداعى الىپ پاندالار پوپۋلياتسياسى 830 عا جەتكەنىن حابارلاعان ەدىك.