ينستاگرام 10 جىلدان كەيىن العاش رەت ماڭىزدى وزگەرىس ەنگىزدى
استانا. قازاقپارات – Instagram كەيىنگى 10 جىلدا العاش رەت ۆيزۋالدى ستيلىنىڭ ماڭىزدى ەلەمەنتتەرىنىڭ ءبىرىن جاڭارتتى. الەۋمەتتىك جەلى قولدانبادا كورسەتىلەتىن Instagram اتاۋىنىڭ فيرمالىق جازۋىن وزگەرتتى. ال كوپشىلىككە تانىس ءتۇرلى ءتۇستى كامەرا بەلگىشەسى بۇرىنعى قالپىندا قالدى، دەپ حابارلايدى theverge.com.
Instagram باسشىسى ادام موسسەريدىڭ ايتۋىنشا، بۇرىنعى جازۋ ون جىل بويى وزگەرمەگەندىكتەن، ونى جاڭارتاتىن ۋاقىت كەلگەن.
جاڭا نۇسقادا بۇرىنعى قولجازبا ءستيلى ساقتالعانىمەن، ارىپتەردىڭ ءپىشىنى قاراپايىم ءارى زاماناۋي ەتىپ جاسالعان. موسسەري جاڭا ديزايندى «تازا ءارى زاماناۋي» دەپ سيپاتتاپ، سونىمەن قاتار بۇرىنعى Instagram ستيلىمەن ساباقتاستىق ساقتالعانىن ايتتى.
الايدا جاڭارتۋ جەلى قولدانۋشىلارى اراسىندا بىردەن پىكىرتالاس تۋعىزدى. كەيبىر پايدالانۋشىلار جاڭا ءقارىپتىڭ وقىلۋى قيىنداعانىن ايتىپ، Instagram اتاۋىنداعى ارىپتەر باسقا سوزگە ۇقساپ كەتكەنىن ازىلگە اينالدىرعان. موسسەريدىڭ ءوزى دە جاڭا ديزاين ءتۇرلى پىكىر تۋدىرۋى مۇمكىن ەكەنىن بولجاپ، Threads جەلىسىندە قولدانۋشىلاردىڭ رەاكتسياسىن باقىلاپ وتىرعانىن جازدى.
Instagram سوڭعى رەت فيرمالىق جازۋىن شامامەن 2016 -جىلى تۇبەگەيلى وزگەرتكەن ەدى. سودان بەرى كومپانيانىڭ ۆيزۋالدى ستيلىندە ءتۇرلى جاڭارتۋ بولعانىمەن، اتاۋدىڭ نەگىزگى جازىلۋى وزگەرىسسىز قالىپ كەلگەن.
