ىستانبۇلدا الكوگولدەن ۋلانىپ، كوز جۇمعاندار سانى 38 ادامعا جەتتى
استانا. KAZINFORM - تۇركيانىڭ ەڭ ءىرى مەگاپوليسىندە الكوگولدەن ۋلانعاندار سانى ارتىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قازىرگى ۋاقىتتا قالالىق اۋرۋحانالارعا 92 ادام ەمدەلۋگە جۇگىندى، ولاردىڭ 38 ءى دارىگەرلەردىڭ كۇش سالعانىنا قاراماستان قايتىس بولدى. زارداپ شەككەن تاعى 26 ادام جانساقتاۋ بولىمىندە جاتىر جانە جاساندى تىنىس الۋ اپپاراتىنا قوسىلعان.
ىستانبۇلدىڭ گيۋنگەرەن، بەيوعلى، باكىركەي جانە باشاكشەحير اۋداندارىندا جالعان سپيرتتەن ۋلانۋ وقيعالارى تىركەلدى. وندا زارداپ شەككەندەر اۋىر ۋلانۋ بەلگىلەرىمەن اۋرۋحانالارعا جەتكىزىلدى.
الدىن الا مالىمەت بويىنشا، جاساندى الكوگولدىڭ قۇرامىندا بولعان مەتانولدىڭ ۋلى اسەرىنەن ۋلانۋ كۇدىگىمەن اۋرۋحاناعا جاتقىزىلعان 88 ادامنىڭ 38 ءى قايتىس بولدى. قايتىس بولعاندار اراسىندا تۇركيانىڭ وكىلدەرى مەن وزبەكستاننىڭ 6 ازاماتى بار.
سوڭعى جىلدارى ەلدە جالعان الكوگولدەن ۋلانۋ وقيعالارى جيىلەپ كەتتى. ساراپشىلار مۇنى زاڭدى الكوگول باعاسىنىڭ قىمباتتاۋىمەن بايلانىستىرادى. سونىڭ سالدارىنان كەيبىر ادامدار ارزانىن ساتىپ الۋعا بارادى.
جەرگىلىكتى بيلىك ءقاۋىپتى الكوگولدى تاراتۋدىڭ بارلىق كوزىن انىقتاۋ ءۇشىن تەكسەرۋدى كۇشەيتىپ، تەرگەۋ جۇمىستارىن باستادى. پوليتسەيلەر رەيد جۇرگىزىپ، ءونىم وندىرۋگە جانە ساتۋعا قاتىسى بار كۇدىكتىلەردى ۇستاۋ ۇستىندە.
ىستانبۇلدا قۇقىق قورعاۋ ورگاندارى توعىز كۇدىكتىنى ۇستادى. ولاردىڭ ۇشەۋى جاۋاپ بەرگەننەن كەيىن بوساتىلدى، التاۋىنا قاتىستى تەرگەۋ جالعاسىپ جاتىر.
جالپى، سوڭعى بىرنەشە كۇندە پوليتسەيلەر 32862 ليتر زاڭسىز مەتيل جانە ەتيل سپيرتىن تاركىلەدى. تاركىلەۋ سۇلتانعازي، فاتيح، باكىركەي، كيۋچۋكچەكمەدجە، چاتالدجا، ەسەنيۋرت، زەيتينبۋرنۋ جانە بەيكوز اۋداندارىندا بولدى. جەدەل ءىس-شارالار بارىسىندا سونداي-اق 227 بوتەلكە كونترافاكتىلىك الكوگولدىك سۋسىن مەن ونى ايدايتىن جابدىق انىقتالدى.
تۇركيادا جالعان الكوگولدەن زارداپ شەككەندەر سانى ءالى ارتىپ، سوڭى قايعىلى جاعدايعا ۇلاسىپ وتىرعانىن جازعان بولاتىنبىز.
