يسمايل حانيانىڭ قازاسى: تۇركيا، يران، يەمەندىك حۋسيتتەر مەن «حەزبوللا» يزرايلگە قوقان-لوقى كورسەتتى

استانا. KAZINFORM - يراننىڭ جاڭا پرەزيدەنتى ماسۋد پەزەشكيان تەگەرانداعى حاماس كوشباسشىلارىنىڭ ءبىرى يسمايل حانيانىڭ قازاسىن قاتاڭ سىنعا الىپ، يران «ءوزىنىڭ اۋماقتىق تۇتاستىعىن قورعايتىنىن» ايتتى، دەپ جازادى BILD.

پەزەشكيان سونىمەن قاتار «لاڭكەستىك باسقىنشىلار وزدەرىنىڭ ارەكەتى ءۇشىن وكىنەتىنىن» ايتتى.

يراننىڭ رۋحاني كوسەمى ءالي حامەنەي حانيانىڭ قازاسى ءۇشىن «قاتاڭ جازا قولدانۋ - تەگەراننىڭ مىندەتى» ەكەنىن مالىمدەدى.

يەمەندىك حۋسيتتەردىڭ وكىلدەرى دە حانيانىڭ قازاسىنا قاتىستى پىكىر ءبىلدىردى. ولار حاماس جەتەكشىسىنىڭ ءولتىرىلۋىن «اۋىر تەرروريستىك قىلمىس» جانە «زاڭدى ورەسكەل بۇزۋ» دەپ اتادى. سونىمەن بىرگە يەمەندىك حۋسيتتەردىڭ وزدەرى دە سوڭعى ايلاردا قىزىل تەڭىز بەن ادەن شىعاناعىنداعى كەمەلەردى يزرايل پورتتارىندا بايلانىپ قالماۋ ءۇشىن زىمىرانمەن اتقىلاۋعا كوشكەن.

حانيانىڭ قازاسىنان كەيىن «حەزبوللا» لاڭكەستىك ۇيىمى يزرايلگە قوقان-لوقى جاساپ ۇلگەردى. حەزبوللانىڭ مالىمدەۋىنشە، ونىڭ قازاسى «يزرايلگە قارسىلىقتى ودان سايىن كۇشەيتە تۇسەدى».

بۇعان قوسا تۇركيانىڭ سىرتقى ىستەر مينيسترلىگى دە رەسمي تۇسىنىك بەردى. تۇركيا سىرتقى ىستەر مينيسترلىگى وكىلىنىڭ ايتۋىنشا، «حانيانىڭ قازاسى گازاداعى سوعىستى حالىقارالىق اۋقىمعا كەڭەيتۋگە باعىتتالعان».

يزرايلدىڭ مادەني مۇرا ءمينيسترى اميحاي ەلياگۋ ءوز كەزەگىندە حانيانىڭ قازاسىنا قۋانىشتى ەكەنىن جاسىرمادى.

- حانيانىڭ ءولىمى الەمدى ءبىرشاما جاقسارتادى، - دەپ جازدى ول X الەۋمەتتىك جەلىسىندە.

وسىعان ۇقساس پىكىردى حاماس سودىرلارى گازا سەكتورىنا الىپ كەتكەن ماتان زانگاۋكەردىڭ اناسى ەيناۆ زانگاۋكەر دە ءبىلدىردى.

- قانىشەر حاماس جەتەكشىلەرىنىڭ ورنى توزاقتا جانە ءبىز ولاردىڭ ءوز جازاسىن العانىن قالايمىز. ءبىراق ءبىز حانيانىڭ قازاسىمەن توقتاپ، جاقىندارىمىزدى تۇتقىندا ولتىرۋگە جول بەرە المايمىز، - دەدى زانگاۋكەر.

ب ۇ ۇ مەن ناتو يسمايل حانيانى ءولتىرۋ تۋرالى ءالى تۇسىنىك بەرگەن جوق.

ەستەرىڭىزگە سالا كەتەيىك، 2024 -جىلدىڭ 31-شىلدەسىندە يراننىڭ مەملەكەتتىك بۇقارالىق اقپارات قۇرالدارى حانيانىڭ يراندا ولتىرىلگەنىن حابارلاعان بولاتىن. ول جاڭادان سايلانعان پرەزيدەنت ماسۋد پەزەشكياندى يناۋگۋراتسيالاۋ راسىمىنە قاتىسىپ تۇرعان.

اۆتور
ەركەجان سماعۇلوۆا