يسلانديادا جانارتاۋ اتقىلاعان گرينداۆيك قالاسى بۇرىنعىداي بولمايدى

  استانا. KAZINFORM -قورعانىس قۇرىلىمدارى مەن قۇتقارۋشىلار تاۋلىك بويى جۇرگىزگەن جۇمىستىڭ ارقاسىندا اۋقىمدى قيراۋلار بولعان جوق.

يسلانديا ۇكىمەتى وتىرىس وتكىزىپ، قالاداعى جاعدايدى تالقىلادى، دەپ حابارلايدى ەuronews.

يسلاندياداعى گرينداۆيك قالاسىن تالقانداعان لاۆا اعىنى باياۋلادى، ءبىراق ول ءالى دە قاۋىپ ءتوندىرىپ تۇر.

يسلانديانىڭ مەتەورولوگيالىق باسقارماسىنىڭ مالىمدەۋىنشە، رەيكيانەس تۇبەگىندە «جانارتاۋ اتقىلاۋى قانشا ۋاقىتقا سوزىلاتىنىن بولجاۋ قيىن».

جەرگىلىكتى تۇرعىندار الدىن الا ەۆاكۋاتسيالاندى. قازا بولعاندار مەن زارداپ شەككەندەر جوق. جانارتاۋ اتقىلاۋى سالدارىنان پايدا بولعان جارىققا قۇلاپ كەتكەن جۇمىسشى ءىز- ءتۇزسىز جوعالدى.

قالعان لاۆا اعىنىنىڭ كوپ بولىگى قازىر قورعانىس توسقاۋىلدارى بويىمەن وڭتۇستىك- باتىسقا باعىتتالىپ، ونىڭ تراەكتورياسى تۇراقتانعان سياقتى.

دۇيسەنبىدە ۇكىمەت وتىرىسى ءوتتى. ەلدىڭ ادىلەت ءمينيسترى گۋدرۋن حافستەينسدوتتير ءمالىم ەتكەندەي، بۇل قالا ەشقاشان بۇرىنعىداي بولمايدى، ال تۇرعىندارى وعان الداعى ايلاردا ورالا المايدى.

«بولاشاقتا نە بولاتىنىن بولجاۋ وتە قيىن. ءبىراق مەن وپتيميست بولامىن. گرينداۆيكتە ەلدى مەكەن بولادى، ءبىراق ول باسقاشا بولادى. وكىنىشكە قاراي، گرينداۆيك بۇرىنعىداي بولمايدى»، - دەدى ول.

تابيعي اپات قۇتقارۋشىلاردىڭ تاۋلىك بويى جۇمىس ىستەۋىنىڭ ارقاسىندا اۋىزدىقتالدى. جەلتوقسان ايىندا جانارتاۋ اتقىلاۋىنان كەيىن سالىنعان قورعانىس لاۆانى ءىشىنارا ۇستاپ قالدى، ءبىراق كەيبىرەۋلەرى ەكى جارىقشاق اشىلعاننان كەيىن بۇزىلدى.

ساراپشىلاردىڭ پىكىرىنشە، سوڭعى اتقىلاۋ اۋاعا كوپ مولشەردە كۇل شىعارمايدى. كەفلاۆيك حالىقارالىق اۋەجايىنداعى جۇمىس قالىپتى رەجيمدە جالعاسۋدا.

ەسكە سالا كەتسەك، بۇعان دەيىن يسلانديادا ءىرى جانارتاۋ اتقىلاي باستاعانى تۋرالى جازعان ەدىك.