ەگىس القاپتارىندا درونداردى كەڭىنەن پايدالانۋ كەرەك - ولجاس بەكتەنوۆ

استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا اۋىل شارۋاشىلىعى ءونىمىن شىققان جەرىنەن سوڭعى تۇتىنۋشىعا دەيىن جەتكىزۋدىڭ اشىق تىزبەگىن قۇرۋدى تاپسىردى.

- سيفرلاندىرۋ مەملەكەتتىك قولداۋ شارالارىنىڭ اشىقتىعى مەن تيىمدىلىگىن ارتتىرۋعا ىقپال ەتۋگە ءتيىس. اۋىل شارۋاشىلىعى جەرلەرىن ەسەپكە الۋدا IT- قۇرالداردى ەنگىزۋ ماڭىزدى.

سيفرلاندىرۋ القاپتار مەن جايىلىمدىق جەرلەردى ۇتىمدى پايدالانۋعا، ەگىن ەگۋ جۇمىستارىن ءتيىمدى جوسپارلاۋعا ىقپال ەتۋى قاجەت. وسىعان وراي، بارلىق اۋىل شارۋاشىلىعى القاپتارىنا عارىشتىق مونيتورينگتى كەڭىنەن قولدانىپ، درونداردى پايدالانۋ كەرەك، - دەدى ۇكىمەت باسشىسى.

سونداي-اق ول ىقتيمال قۋاڭشىلىقتاردى سيفرلىق تەحنولوگيالار كومەگىمەن ەرتە بولجاۋ باعىتىندا ىزدەنىستەردى كۇشەيتۋ كەرەكتىگىن ايتتى.

- ءونىمدى شىققان جەرىنەن سوڭعى تۇتىنۋشىعا دەيىن جەتكىزۋدىڭ اشىق تىزبەگىن قۇرۋ قاجەت. بۇل جۇيە وندىرىلگەن ءونىمدى ەسەپكە الۋعا، ونىڭ ساپاسىنا كەپىلدىك بەرۋگە، بيولوگيالىق جانە ۆەتەرينارلىق قاۋىپسىزدىكتى باقىلاۋعا باعىتتالۋعا ءتيىس.

كليماتتىق تاۋەكەلدەردى، استىقتىڭ ءتۇسىمىن جانە ازىق-تۇلىك ونىمدەرىنىڭ نارىقتىق باعاسىن بولجاۋ ءۇشىن سيفرلىق شەشىمدەر مەن جاساندى ينتەللەكتىنى كەڭىنەن قولدانۋ كەرەك. جاساندى ينتەللەكتىنى قولدانا وتىرىپ، ەگىندى سۋارۋ، وسىمدىكتەردى قورعاۋ قۇرالدارى مەن تىڭايتقىشتاردى قولدانۋ، جەم-ءشوپ تۇتىنۋ، سونداي-اق اۋىل شارۋاشىلىعى تەحنيكالارى پاركىن باسقارۋ پروتسەستەرىن وڭتايلاندىرۋ قاجەت، - دەدى ولجاس بەكتەنوۆ.

سونىمەن قاتار بۇگىن ەنەرگەتيكا مينيسترلىگى كوكتەمگى ەگىس ماۋسىمىنا ديزەل باعاسىن ۇسىندى.

اۆتور

ەسىمجان ناقتىباي