يراننىڭ ۋاقىتشا پرەزيدەنتى كىم بولادى

 استانا. KAZINFORM - يران يسلام رەسپۋبليكاسى كونستيتۋتسياسىنىڭ 131-بابىنا سايكەس، ەل پرەزيدەنتى قايتىس بولعان جاعدايدا، مەملەكەت تىزگىنى مەملەكەتتىك ماسەلەلەردە سوڭعى شەشىمدى قابىلدايتىن جوعارعى كوشباسشىنىڭ ماقۇلداۋىمەن ءبىرىنشى ۆيتسە-پرەزيدەنتكە وتەدى، دەپ حابارلايدى Kazinform ءتىلشىسى ارسەن ۋتەشيەۆ.

اتالعان باپتا «پرەزيدەنت قايتىس بولعان جاعدايدا، جۇمىستان بوساتىلسا، وتستاۆكاعا كەتسە نەمەسە ەكى ايدان استام ۋاقىت سىرقاتتانىپ قالسا، بيلىك ونىڭ ءبىرىنشى ورىنباسارىنا وتەدى» دەلىنگەن.

قازىر يراننىڭ ۆيتسە- پرەزيدەنتى - 69 جاستاعى مۇحاممەد موحبەر. ول ەلدەگى قامقورشىلار كەڭەسىن باسقارادى. موحبەرگە 2007 -جىلدان بەرى اياتوللا حامەنەي بۇيرىقتارىنىڭ ورىندالۋىن قاداعالاۋ جۇكتەلگەن.

ەندى يران بيلىگى 50 كۇن ىشىندە جاڭا پرەزيدەنتتى سايلاۋى كەرەك. بۇل دا ەلدىڭ اتا زاڭىندا كورسەتىلگەن. كەلەسى باسشىنىڭ سايلاۋىن ۇيىمداستىرۋ ۆيتسە- پرەزيدەنت پەن پارلامەنت سپيكەرىنە جانە سوت بيلىگىنىڭ باسشىسىنا جۇكتەلگەن.

ايتا كەتەيىك، 63 جاستاعى ەبراحيم رايسي يران پرەزيدەنتى بولىپ 2021 -جىلى سايلانعان. كەلەسى پرەزيدەنتتىك سايلاۋ 2025 -جىلعا جوسپارلانعان ەدى.

Reuters اگەنتتىگىنىڭ حابارلاۋىنشا، پرەزيدەنتتىڭ تىكۇشاق اپاتىنا يراننىڭ ساياسي، الەۋمەتتىك جانە ەكونوميكالىق داعدارىس ماسەلەلەرى سەبەپ بولۋى مۇمكىن. ەلدىڭ ءدىني بيلەۋشىلەرى يادرولىق قارۋعا كوزقاراستارى مەن ۋكرايناداعى سوعىس كەزىندە رەسەيمەن اسكەري بايلانىس ورناتقانى ءۇشىن حالىقارالىق قىسىمعا تاپ بولدى.

جالپى يران يسلام رەسپۋبليكاسىنىڭ رۋحاني پۇرساتتى توپتار (يستەبليشمەنت) مەن ۇكىمەتتەن قۇرالاتىن باسقارۋ جۇيەسىندە ساياسي ماسەلەلەر بويىنشا شەشىم قابىلداردا سوڭعى ءسوزدى ىلعي دا 85 جاستاعى رۋحاني كوشباسشى رايسي اياتوللا الي حامەنەي ايتادى. بۇل جۇيە 1989 -جىلدان بەرى جۇمىس ىستەپ كەلەدى.

مارقۇم ەبراحيم رايسي يراننىڭ كەلەسى رۋحاني كوشباسشىسى بولۋعا بىردەن-ءبىر ۇمىتكەر بولاتىن.

اۋدارعان: التىنبەك ءاميت