يرانداعى وت فەستيۆالى كەزىندە 26 ادام قازا تاپتى

Иран
فوتو: en.mehrnews.com

تەگەران. KAZINFORM - يراندا چاحارشانبە- سۋري وت فەستيۆالىن تويلاۋ كەزىندە 26 ادام قازا تاۋىپ، 4360 ادام جاراقات العان. بۇل تۋرالى «Mehr» اگەنتتىگى حابارلادى.

بۇل مەرەكەدە يراندىقتار وتتىڭ ۇستىنەن سەكىرۋ جانە پيروتەحنيكالىق زاتتاردى دۇرىس پايدالانباۋ سالدارىنان كۇيىپ قالادى. وتكەن جىلى بۇل مەرەكە كەزىندە 700 دەن استام ادام جاراقات الىپ، كەم دەگەندە 17 ادام قايتىس بولعان.

تاسس اگەنتتىگىنىڭ جەرگىلىكتى اقپارات كوزدەرىنە سۇيەنە وتىرىپ حابارلاۋىنشا، يراننىڭ توتەنشە جاعدايلار قىزمەتىنىڭ باسشىسى 1400 گە جۋىق شۇعىل مەديتسينالىق پۋنكت مەرەكەلەرگە دايىن ەكەنىن ايتقان. تەك تەگەراننىڭ وزىندە ءبىر كۇندە ءورت ءقاۋپى تۋرالى 1800 قوڭىراۋ ءتۇسىپ، استانانىڭ 2 تۇرعىنى قازا تاپقان.

چاحارشانبە- سۋري - يرانداعى كونە وت مەرەكەسى، كوكتەمنىڭ كەلۋى مەن تابيعاتتىڭ قايتا جاندانۋىن بىلدىرەدى.

چاحارشانبە- سۋري كۇنتىزبەلىك جىلدىڭ سوڭعى سارسەنبىسىنە قاراعان ءتۇنى تويلانادى (يراندا سارسەنبى «چاحارشانبەح» دەپ اتالادى)، ءبىراق مەرەكەنىڭ ءوزى ەكى- ءۇش اپتا بۇرىن باستالادى.

ءداستۇر بويىنشا يراندىقتار ءتاتتى جانە قىشقىل جاڭعاقتاردىڭ ەرەكشە قوسپاسىن جەپ، كەشكە كوشەدە وت جاعىپ، ۇستىنەن سەكىرەدى. قازىرگى مەرەكەلىك داستۇرلەردە پيروتەحنيكالىق زاتتاردى قولدانىلادى.

اۆتور
جاراسقان نۇرىبايەۆ

سوڭعى جاڭالىقتار