يراندا تاعى ەكى اۋەجاي قايتا جۇمىس ىستەي باستادى

استانا. KAZINFORM - يران ازاماتتىق اۆياتسيا ۇيىمى ەل استاناسى تەگەراندا ورنالاسقان ەكى نەگىزگى اۋەجايدىڭ جۇمىسىن قايتا جانداندىرعانىن حابارلادى. بۇل تۋرالى شينحۋا جازدى.

بۇل شەشىمگە سايكەس، تەگەران قالاسىنداعى حالىقارالىق يمام حومەيني اتىنداعى حالىقارالىق اۋەجاي مەن مەحراباد حالىقارالىق اۋەجايى جولاۋشىلار رەيستەرىن قايتا قابىلداي باستايدى. بۇل تۋرالى يراندىق جارتىلاي رەسمي Fars News Agency اگەنتتىگى حابارلاعان.

ۆەدومستۆو مالىمەتىنشە، 25 ساۋىردەن باستاپ ءبىرقاتار قالاعا دا اۋە قاتىناسى قالپىنا كەلتىرىلەدى. ولاردىڭ قاتارىندا ۋرميا، ابادان، كەرمانشاح، شيراز، كەرمان، رەشت، يەزد، زاحەدان، گورگان جانە بيردجەند قالالارى بار.

سونىمەن قاتار، بۇعان دەيىن يران ۇكىمەتى مەشحەد قالاسىنان حالىقارالىق رەيستەردى قايتا ىسكە قوسقانىن مالىمدەگەن. بۇل قالا ەلدىڭ سولتۇستىك-شىعىسىنداعى حوراسان-رەزاۆي پروۆينتسياسىندا ورنالاسقان.

18-ءساۋىر كۇنى ەلدىڭ شىعىس بولىگى حالىقارالىق رەيستەر ءۇشىن قايتا اشىلىپ، اۋە قاتىناسىنىڭ بىرتىندەپ قالپىنا كەلۋىنە جول اشىلعان ەدى.

يران بيلىگى بۇعان دەيىن قاۋىپسىزدىك جاعدايىنا بايلانىستى بارلىق ازاماتتىق اۋە رەيستەرىن ۋاقىتشا توقتاتقان بولاتىن. ەندى اسكەري جانە ازاماتتىق ورگاندار تەحنيكالىق جانە وپەراتسيالىق دايىندىقتى اياقتاعاننان كەيىن اۋە قاتىناسى تولىق قالىپقا كەلتىرىلەدى دەپ كۇتىلەدى.

وسىدان بۇرىن رەسەي ب ا ءا-گە جانە يراننىڭ اۋە كەڭىستىگى ارقىلى ۇشۋعا قويعان شەكتەۋلەردى الىپ تاستاعانى بەلگىلى بولدى.