يراندا پرەزيدەنت سايلاۋى باستالدى

 استانا. KAZINFORM - بۇگىن، 28-ماۋسىمدا يراندا كەزەكتەن تىس پرەزيدەنت سايلاۋى باستالدى. بۇل تۋرالى tasnim اقپارات اگەنتتىگى حابارلادى.

ەلدىڭ جوعارعى كوشباسشىسى اياتوللا ءالي حامەنەي سايلاۋ پروتسەسى باستالعان بويدا داۋىس بەرىپ، بارشا يراندىقتاردى سايلاۋعا بەلسەندى قاتىسۋعا شاقىردى. ول سونداي-اق داۋىس بەرگەننەن كەيىن يران حالقى ءۇشىن ەڭ جاقسى كۇندەر مەن جىلدار ءۇشىن دۇعا ەتتى. سايلاۋ كۇنىن يراندىقتار ءۇشىن «باقىت پەن قۋانىش كۇنى» دەپ سيپاتتاعان حامەنەي الداعى بىرنەشە جىلداعى ەلدىڭ تاعدىرىن بەلگىلەيتىن پرەزيدەنتتىك سايلاۋعا كەلۋ بارىنەن دە ماڭىزدى ەكەنىن باسا ايتتى.

«يران يسلام رەسپۋبليكاسىنىڭ الەمدە جالعاسۋى، ابىرويى، قادىرى مەن قۋاتى حالىقتىڭ بار بولۋىنا بايلانىستى ، - دەدى حامەنەي.

ەل بويىنشا سايلاۋ ۋچاسكەلەرى جەرگىلىكتى ۋاقىتپەن تاڭعى ساعات 8:00 دە اشىلدى جانە سايلاۋ پروتسەسى ون ساعاتقا سوزىلادى. ءبىراق قاجەت بولعان جاعدايدا ەلدىڭ ىشكى ىستەر مينيسترلىگى سايلاۋ مەرزىمىن ۇزارتا الادى. ەل ىشىندە جانە شەتەلدە جالعاسىپ جاتقان سايلاۋعا 61 ميلليون 450 مىڭنان استام يراندىق سايلاۋشى قاتىسا الادى. 2006 -جىلدىڭ 28-ماۋسىمىندا نەمەسە ودان بۇرىن تۋعان يراندىق داۋىس بەرۋگە قۇقىلى.

رەسپۋبليكا بويىنشا 59 مىڭعا جۋىق سايلاۋ ۋچاسكەسى، ونىڭ ىشىندە 15 مىڭنان استام جىلجىمالى ۋچاسكەلەر قۇرىلعان. شەتەلدەگى يران ازاماتتارىنىڭ قاتىسۋى ءۇشىن 100 ەلدە بارلىعى 340 سايلاۋ ۋچاسكەسى جۇمىس ىستەپ جاتىر.

سايلاۋ مامىر ايىندا يران پرەزيدەنتى يبراگيم ءرايسيدىڭ قايتىس بولۋىنا بايلانىستى مەرزىمىنەن ءبىر جىل بۇرىن وتكىزىلىپ جاتىر. 1979 -جىلى يسلام ريەۆوليۋتسياسىنىڭ جەڭىسىنەن بەرگى 14 جاڭا اكىمشىلىك ماۋسىم ايىنىڭ اياعىندا نەمەسە شىلدەنىڭ باسىندا بيلىككە كەلىپ، ءتورت جىل قىزمەت ەتەدى.

ايتا كەتەيىك، يران پرەزيدەنتى اكىمشىلىگىنىڭ باسشىسى رولام حۋسەين ەسمايلي ەل پرەزيدەنتى رايسي مىنگەن تىكۇشاقپەن قاتارلاسا ۇشقان اۋە كەمەسىندە بولعان. ول قايعىلى وقيعاعا قاتىستى تىڭ ءمان- جايدى ايتىپ بەرگەن ەدى.