يراندا گەنەرالدىڭ مولاسىنىڭ جانىنداعى جارىلىستان مەرت بولعاندار سانى 100 دەن استى

يراننىڭ وڭتۇستىگىندە كەرمان قالاسىنداعى مولانىڭ جانىندا بولعان ەكى جارىلىس سالدارىنان كەمىندە 103 ادام مەرت بولىپ، 170 تەن استام ادام جاراقات العان. بۇل تۋرالى يران ب ا ق-تارى ءمالىم ەتتى، دەپ حابارلايدى قازاقپارات BBC اگەنتتىگىنە سىلتەمە جاساپ.

جارىلىس قۇربانى بولعان جانە زارداپ شەككەندەر يسلام رەۆوليۋتسياسى ساقشىلارى كورپۋسىنىڭ گەنەرالى قاسەم سۇلەيمانيدىڭ ومىردەن وتكەنىنە 4 جىل تولۋىنا ارنالعان راسىمگە كەلگەن. يران بيلىگى بۇل وقيعانى تەرروريستىك اكت دەپ باعالادى.

يراننىڭ مەملەكەتتىك بۇقارالىق اقپارات قۇرالدارىنىڭ حابارلاۋىنشا، ارنايى ءراسىم بارىسىندا ەكى جارىلىس بولعان.

يراننىڭ «حابار» كانالىنا سۇحبات بەرگەن ەلدىڭ ىشكى ىستەر ءمينيسترى احماد ۆاحيدي بۇل وقيعانى قاساقانا ۇيىمداستىرىلعان ارەكەت دەپ باعالادى.

ونىڭ سوزىنشە، ءبىرىنشى جارىلىس جەرگىلىكتى ۋاقىت بويىنشا ساعات 3:00 كەزىندە بولعان. ال 3:20 كەزىندە قۇتقارۋشىلار مەن وزگە دە ادامدار زارداپ شەككەندەرگە كومەككە كەلگەندە ەكىنشى جارىلىس بولعان.