يراندا حيدجاب كيمەگەنى ءۇشىن سوققىعا جىعىلعان قىز قايتىس بولدى

يراندا بىرنەشە اي بويى جانساقتاۋ بولىمىندە جاتقان 16 جاستاعى ارميتا گەراۆاند قايتىس بولدى. قۇقىق قورعاۋشىلاردىڭ ايتۋىنشا، ول حيدجاب كيمەگەنى ءۇشىن مەترودا ادەت-عۇرىپ ءدىني پوليتسياسىنىڭ قولىنا تۇسكەن كەزدە اۋىر جاراقات العان. بۇل تۋرالى BBC حابارلايدى.

«28 كۇن بويى قارقىندى تەراپيا بولىمىندە ەم العان تەگەراندىق ستۋدەنت ارميتا گەراۆاند ءبىر ساعات بۇرىن قايتىس بولدى»، - دەپ حابارلادى يران يسلام رەسپۋبليكاسىنىڭ جاستار مينيسترلىگىنە قاراستى Borna اقپارات اگەنتتىگى.

Hengaw تاۋەلسىز قۇقىق قورعاۋ ۇيىمىنىڭ مالىمەتىنشە، مەتروداعى وقيعا 3- قازان كۇنى بولعان.

ادەت-عۇرىپ ءدىني پوليتسياسى ونى پلاتفورمادا توقتاتىپ، باسىنا ورامال تاعۋىن تالاپ ەتكەن. قىز ودان باس تارتقاندا، ولار وعان كۇش قولدانىپ، سالدارىنان بويجەتكەن جاقىن ماڭداعى اسكەري گوسپيتالعا جەتكىزىلدى.

بۇل ەلدىڭ بيلىگى قىز بالاعا جاراقاتتاردى پوليتسيا قىزمەتكەرلەرى سالعان دەگەندى ءۇزىلدى-كەسىلدى جوققا شىعارىپ وتىر.

كوماعا ارميتا گەراۆاند قازان ايىنىڭ باسىندا تۇسكەن بولاتىن.

كوپتەگەن يراندىق ارميتانىڭ وقيعاسىن وتكەن جىلى 22 جاستاعى ماحسا امينيعا قاتىستى بولعان وقيعامەن سالىستىردى. ول دا حيدجاب كيۋ ەرەجەلەرىن ساقتاماعانى ءۇشىن ۇستالعان پوليتسيا كولىگىندە سوققىعا جىعىلعان ماحسا بىرنەشە كۇننەن كەيىن قايتىس بولدى.

ونىڭ ءولىمى ەلدە جاپپاي نارازىلىق تۋعىزىپ، پاترۋلدىڭ ۋاقىتشا توقتاۋىنا سەبەپ بولعان ەدى. ماحسا اميني قايتىس بولعاننان كەيىن يراندا ەرەۋىلدەر كوپ بولدى، ءبىراق وعان بۇكىل حالىق جاپپاي قوسىلا قويعان جوق.