يراندا 2023-جىلى ازەربايجان ەلشىلىگىنە شابۋىل جاساعان ادام ءولىم جازاسىنا كەسىلدى
استانا. KAZINFORM - شابۋىل جاساۋشى ادام ءولتىرۋ، قارۋدى زاڭسىز ساقتاۋ جانە قوعامدىق ءتارتىپتى بۇزعانى ءۇشىن كىنالى دەپ تانىلدى.
يراندا 2023-جىلدىڭ قاڭتارىندا تەگەرانداعى ازەربايجان ەلشىلىگىنە قارۋلى شابۋىل جاساپ، ەلشىلىكتىڭ قاۋىپسىزدىك قىزمەتىنىڭ باسشىسىن ءولتىرىپ، تاعى ەكى ادامدى جاراقاتتاعانى ءۇشىن سوتتالعان ادام ءولىم جازاسىنا كەسىلدى. بۇل تۋرالى يراندىق IRNA اقپارات اگەنتتىگى حابارلادى.
سوتتالعان ادامنىڭ اتى-ءجونى جاريالانبادى. ب ا ق مالىمەتىنشە، ۇكىم زاڭدى كۇشىنە ەنگەننەن كەيىن ناقتى ءمان-جاي كورسەتىلمەي ورىندالعان. ادەتتە، يراندا ءولىم جازاسى دارعا اسۋ ارقىلى جۇزەگە اسىرىلادى. شابۋىل جاساۋشى ادام ءولتىرۋ، قارۋدى زاڭسىز ساقتاۋ جانە قوعامدىق تىنىشتىقتى بۇزعانى ءۇشىن كىنالى دەپ تانىلدى.
يران بيلىگى بۇعان دەيىن شابۋىلعا جەكە تراگەديا سەبەپ بولعانىن مالىمدەگەن بولاتىن - شابۋىلشى ەلشىلىككە بارعان كەزدە «ءىز-ءتۇزسىز جوعالىپ كەتكەن» ايەلىنەن ايىرىلعان. الايدا باكۋدە بۇل وقيعا لاڭكەستىك ارەكەت دەپ تانىلدى. ازەربايجان پرەزيدەنتى يلحام اليەۆ يراندى قابىلداۋعا بولمايتىن ءسوز بايلاسۋى ءۇشىن ايىپتاپ، ەلشىلىك قىزمەتكەرىنىڭ ولىمىنە قاتىستى اشۋىن ءبىلدىردى.
شابۋىلدان كەيىن ازەربايجاننىڭ ديپلوماتيالىق وكىلدىگى جابىلىپ، ونىڭ قىزمەتكەرلەرى يران اۋماعىنان كەتتى. 2023-جىلدىڭ ساۋىرىندە باكۋ ءتورت يراندىق ديپلوماتتى ەلدەن شىعاردى، تەگەران وعان اينا شاراسىمەن جاۋاپ بەردى. ازەربايجان ەلشىلىگى تەك 2024-جىلدىڭ شىلدەسىندە قايتا اشىلدى، ءبىراق باسقا جەردە.
ەكى ەل اراسىنداعى قارىم-قاتىناس وقيعاعا دەيىن دە شيەلەنىسكەن. باكۋ يراندى ازەربايجانداعى جاعدايدى تۇراقسىزداندىرۋعا تىرىساتىن راديكالدى ەلەمەنتتەردى قولدادى دەپ بىرنەشە رەت ايىپتادى. تەگەران ايىپتاۋلاردى جوققا شىعاردى. قاقتىعىستىڭ سەبەپتەرىنىڭ ءبىرى ازەربايجاننىڭ يزرايلمەن تىعىز بايلانىسى بولىپ قالا بەرەدى، بۇل يراندا الاڭداۋشىلىق تۋدىرىپ وتىر.
ازەربايجان يراننىڭ سولتۇستىك-باتىسىمەن شەكتەسەدى جانە يسلام رەسپۋبليكاسى اۋماعىندا ەلدەگى ەڭ ۇلكەن ەتنيكالىق ازشىلىق - 12 ميلليوننان استام يراندىق ازەربايجاندا تۇرادى.
بۇعان دەيىن قازاقستان مۇنايىن ازەربايجان ارقىلى تاسىمالداۋ كولەمى 3 ميلليون تونناعا جەتكەنىن جازعان بولاتىنبىز.
