يران ترامپتىڭ يادرولىق كەلىسسوزدەر تۋرالى حاتىن الدى

استانا. KAZINFORM - يراننىڭ رۋحاني كوسەمى ءالي حامەنەي بۇعان اسا قىزىعۋشىلىق تانىتپايتىنىن ءبىلدىردى.

تەگەران ا ق ش پرەزيدەنتى دونالد ترامپتان يراننىڭ يادرولىق باعدارلاماسى بويىنشا كەلىسسوز جۇرگىزۋدى سۇراعان رەسمي حات الدى. حاتتى سارسەنبى كۇنى كەشكە تەگەرانعا كەلگەن بىرىككەن اراب امىرلىكتەرى پرەزيدەنتىنىڭ ديپلوماتيالىق كەڭەسشىسى انۆار گارگاش يران سىرتقى ىستەر ءمينيسترى ابباس اراكچيگە تاپسىردى.

اراكچي سارسەنبى كۇنى كەشكە تەگەرانداعى يران سىرتقى ىستەر مينيسترلىگىندە گارگاشتى قابىلداعاننان كەيىن بىرنەشە ساعات وتكەن سوڭ ءوزىنىڭ Instagram پاراقشاسىندا حاتتى العانىن راستادى، دەپ حابارلايدى IRNA.

ايتا كەتەيىك، 7-ناۋرىزدا ترامپ Fox Business Network ارناسىنا بەرگەن سۇحباتىندا يران كوشباسشىسى ءالي حامەنەيگە حات جولداعانىن ايتقان بولاتىن.

- كەلىسسوز جۇرگىزۋگە كەلىسەسىز دەپ ۇمىتتەنەمىن، ويتكەنى اسكەري جولمەن سوعىسۋىمىز كەرەك بولسا، بۇنىڭ سالدارى وتە اۋىر بولادى، - دەدى ترامپ.

بىرەر كۇن بۇرىن يران سىرتقى ىستەر ءمينيسترى ابباس اراكچي ترامپتىڭ حاتىن اراب مەملەكەتىنىڭ ارنايى وكىلى جاقىن كۇندەرى جەتكىزەتىنىن ايتقان بولاتىن. ال يراننىڭ رۋحاني كوسەمى اياتوللا ءالي حامەنەي سارسەنبى كۇنى ا ق ش- پەن كەلىسسوزدەر جۇرگىزۋدەن باس تارتتى. حامەنەي ۋنيۆەرسيتەت ستۋدەنتتەرى الدىندا سويلەگەن سوزىندە ترامپتىڭ كەلىسسوزدەر تۋرالى ۇسىنىسىن «الداۋ» دەپ باعالادى.

- ءبىز بۇلاردىڭ كەلىسسوز ەرەجەسىن ورىندامايتىنىن ءبىلىپ تۇرساق، كەلىسسوزدىڭ نە كەرەگى بار؟ سوندىقتان كەلىسسوزگە شاقىرۋ... قوعامدىق پىكىر ارقىلى الداۋ، دەپ حابارلايدى يراندىق ب ا ق حامەنەيدىڭ ءسوزىن.

اياتوللا شامادان تىس تالاپتار قويىپ وتىرعان ترامپ اكىمشىلىگىمەن كەلىسسوزدەر «سانكسيالار ءتۇيىنىن قاتايتىپ، يرانعا قىسىمدى كۇشەيتەتىنىن» ايتتى.

2018-جىلى ترامپ ا ق ش- تى يراننىڭ يادرولىق باعدارلاماسىنا قاتىستى «يادرولىق كەلىسىم» دەپ اتالاتىن ورتاق جان-جاقتى ءىس-قيمىل جوسپارىنان (JCPOA) الىپ تاستاپ، يران ەكونوميكاسىن السىرەتەتىن سانكسيالاردى قايتا ەنگىزدى.

2019-جىلى ترامپ اياتوللا حامەنەيمەن تىكەلەي كەلىسسوزدەر جۇرگىزۋگە تىرىسىپ، جاپونيا پرەمەر-ءمينيسترى سيندزو ءابەنى اراشالاۋعا شاقىردى. بۇدان كەيىن يراننىڭ جوعارعى جەتەكشىسى دە بۇل ۇسىنىستى اشىق تۇردە قابىلدامادى جانە «ترامپ حابارلاما الماساتىن ادام ەمەس» دەدى.

حامەنەي سونداي-اق يرانعا كەلەتىن كەز كەلگەن اسكەري سوققىدان ساقتانۋعا نازار اۋداردى.

- يران سوعىس ىزدەمەيدى، ءبىراق امەريكالىقتار نەمەسە ولاردىڭ اگەنتتەرى قاتە قادام جاساسا، ءبىزدىڭ جاۋابىمىز شەشۋشى ءارى ناقتى بولادى جانە امەريكا كوپ زارداپ شەگەدى، - دەدى.

- ەگەر ءبىز يادرولىق قارۋ جاساعىمىز كەلسە، اقش وعان توسقاۋىل بولا الماس ەدى. ءبىز مۇنى ءوزىمىز قالامايمىز، - دەدى اياتوللا.

8-ناۋرىزدا حامەنەي ا ق ش ماسەلەلەردى كەلىسسوزدەر ارقىلى شەشكىسى كەلمەيتىنىن، ءبىراق ءوز تالاپتارىن قويىپ، ۇستەمدىك ورناتقىسى كەلەتىنىن ايتىپ، يراننىڭ بۇعان كەلىسپەيتىنىن اتاپ ءوتتى.

ال قىتاي، يران جانە رەسەي سىرتقى ىستەر مينيسترلىكتەرىنىڭ وكىلدەرى جاقىن ارادا بەيجىڭدە يراننىڭ يادرولىق ماسەلەسىن تالقىلايدى.