يران حالقى پرەزيدەنتتىڭ قايعىلى قازاسىنا بايلانىستى بەس كۇن ازا تۇتادى
استانا. KAZINFORM - يراننىڭ رۋحاني كوسەمى اياتوللا سەيەد ءالي حامەنەي يراننىڭ پرەزيدەنتى يبراحيم رايسي مەن ونىڭ قاسىنداعىلاردىڭ ەلدىڭ سولتۇستىك-باتىسىندا تىكۇشاق اپاتىنان قازا بولۋىنا بايلانىستى بەس كۇندىك جالپىحالىقتىق ازا تۇتۋ جاريالادى، دەپ حابارلايدى IRNA اقپارات اگەنتتىگى.
اياتوللا حامەنەي دۇيسەنبى كۇنى تاڭەرتەڭ تاراتقان جولداۋىندا وتكەن كۇنى يراننىڭ شىعىس ازەربايجان پروۆينتسياسىندا بولعان وقيعادا پرەزيدەنت رايسيدىڭ قايتىس بولۋىنا بايلانىستى قاتتى قايعىردى.
جولداۋدا جوعارعى كوشباسشى رايسيدى ءومىرىن يران حالقىنا، ەلىنە جانە يسلامعا قىزمەت ەتۋگە ارناعان ەڭبەكقور ءدىنباسى جانە تانىمال پرەزيدەنت دەپ سيپاتتادى.
«بۇل قايعىلى وقيعادا يران حالقى جۇرەگى كەڭ، كىشىپەيىل جانە قۇندى قىزمەتشىسىنەن ايىرىلدى»، - دەدى اياتوللا حامەنەي.
ول سونداي-اق پرەزيدەنت رايسي قاسكويلەردىڭ سىنىنا قاراماستان، يران حالقى ءۇشىن تاۋلىك بويى قاجىرلى جۇمىسىن توقتاتپاعانىن قوسىپ ءوتتى.
ول يران حالقىنا كوڭىل ايتىپ، ۆيتسە-پرەزيدەنت موحامماد موحبەرگە ۋاقىتشا پرەزيدەنت قىزمەتىن اتقارۋعا جانە يران پارلامەنتى مەن سوت جۇيەسىنىڭ باسشىلارىمەن الداعى 50 كۇن ىشىندە جاڭا پرەزيدەنتتى سايلاۋعا جول اشۋعا رۇقسات بەردى.
اياتوللا حامەنەي سونداي-اق شىعىس ازەربايجاندا تىكۇشاق اپاتى كەزىندە پرەزيدەنت رايسيمەن بىرگە بولعان باسقا جوعارى لاۋازىمدى تۇلعالاردىڭ، سونىڭ ىشىندە سىرتقى ىستەر ءمينيسترى حوسەين امير ابدوللاحيان، جوعارعى كوشباسشىنىڭ وكىلى جانە تەبريز جۇما نامازىنىڭ يمامى سەيەد موحاممەد ءالي ءال-حاشەمي، شىعىس ازەربايجان گۋبەرناتورى مالەك راحماتيدىڭ قازاسىنا بايلانىستى كوڭىل ايتتى.
ەسكە سالا كەتسەك، 19-مامىر، جەكسەنبى كۇنى شىعىس ازەربايجاننىڭ ۆارزاكان ايماعىنداعى تەبريز قالاسىنا ۇشىپ بارا جاتىپ اپاتقا ۇشىراعان يران يسلام رەسپۋبليكاسىنىڭ سەگىزىنشى پرەزيدەنتى اياتوللا سەيەد يبراحيم رايسي قاسىنداعى رەسمي تۇلعالارمەن بىرگە كوز جۇمدى.
يران پرەزيدەنتى مىنگەن تىكۇشاق ازەربايجانمەن شەكارالاس ۆەرزەگان قالاسىنا جاقىن جەرگە اپاتتى جاعدايدا قوندى.
كەيىنىرەك يران ۆيتسە-پرەزيدەنتى موحسەن مانسۋري يبراحيم رايسي مىنگەن تىكۇشاق اپاتتى جاعدايدا قونعاننان كەيىن قاسىنداعى ەكى ادام بىرنەشە رەت بايلانىسقا شىققانىن ايتتى.
تۇركيا وقيعا ورنىنا 32 الپينيست پەن تىكۇشاق جىبەردى.
ەۋروپالىق كەڭەس ءتوراعاسى شارل ميشەل يران پرەزيدەنتى يبراحيمي رايسيگە قاتىستى جاعداي تۋرالى مالىمدەمە جاسادى.
رەسەي پرەزيدەنتى ۆلاديمير پۋتين اپاتتى جاعدايدا قونعان يران پرەزيدەنتى يبراحيم رايسي مىنگەن تىكۇشاقتى ىزدەۋگە كومەكتەسۋ ءۇشىن 50 قۇتقارۋشى، ەكى ۇشاق پەن تىكۇشاق جىبەرۋگە بۇيرىق بەردى.
