يرانعا قارسى سوعىستىڭ شابۋىل كەزەڭى اياقتالدى - ا ق ش مەملەكەتتىك حاتشىسى

ونىڭ ايتۋىنشا، «ەپيكالىق اشۋ» وپەراتسياسى دەپ اتالعان ا ق ش پەن يزرايلدىڭ باستاپقى شابۋىلدارى قويىلعان ماقساتتارعا قول جەتكىزگەننەن كەيىن اياقتالعان.

- ءبىز بەيبىت جولدى قالايمىز. پرەزيدەنت دونالد ترامپ كەلىسىم جاساۋدى ءجون كورەدى، - دەدى ول جۋرناليستەرگە.

رۋبيونىڭ بۇل مالىمدەمەسى ورمۋز بۇعازى ايماعىنداعى ءبىرقاتار شابۋىلداردان كەيىن جاسالدى. بۇل جاعداي ا ق ش پەن يران اراسىنداعى ءبىتىمنىڭ بۇزىلۋ قاۋپىن كۇشەيتتى. ا ق ش پارسى شىعاناعىنان وسى ماڭىزدى سۋ جولى ارقىلى شىعۋعا تىرىسىپ جاتقان كەمەلەرگە كومەك كورسەتۋگە نيەتتى ەكەنىن مالىمدەدى.

تەگەران ازىرگە رۋبيونىڭ سوزدەرىنە تۇسىنىكتەمە بەرگەن جوق. الايدا بۇعان دەيىن يران پارلامەنتىنىڭ سپيكەرى موحاممەد گاليباف «قازىرگى جاعدايدىڭ ساقتالۋى ا ق ش ءۇشىن قولايسىز ەكەنىن جاقسى تۇسىنەمىز، بۇل تەك باستاماسى عانا» دەپ مالىمدەگەن.

وتكەن ايدا ا ق ش-پەن وتكەن كەلىسسوزدەردە يراننىڭ باس كەلىسسوز جۇرگىزۋشىسى بولعان گاليباف تەڭىزدەگى قاۋىپسىزدىككە قاۋىپ تونگەنىن اتاپ ءوتتى.

- كەمە قاتىناسى مەن ەنەرگيا تاسىمالىنىڭ ترانزيتى اتىستى توقتاتۋ رەجيمىنىڭ بۇزىلۋى مەن ا ق ش جانە ونىڭ وداقتاستارىنىڭ بلوكاداسىنا بايلانىستى قاۋىپكە ۇشىرادى. الايدا ولاردىڭ ارەكەتتەرى ناتيجە بەرمەيدى، - دەدى ول.

سەيسەنبى كۇنى كەشكە ۇلى بريتانيانىڭ تەڭىز ساۋدا وپەراتسيالارى باسقارماسى (UKMTO) دەرەگىنشە، تەكسەرىلگەن اقپارات كوزىنە سۇيەنسەك، ورمۋز بۇعازىندا جۇك كەمەسىنە «بەلگىسىز سنارياد» تيگەن. قوسىمشا مالىمەتتەر ازىرگە جاريالانعان جوق.

بۇعان دەيىن بىرىككەن اراب امىرلىكتەرى ەكى كۇن قاتارىنان يراننىڭ زىمىراندارى مەن دروندارىن اۋە قورعانىسى جۇيەلەرىمەن تويتارىپ جاتقانىن حابارلاعان. دۇيسەنبى كۇنى امىرلىكتەر يراندى فۋدجەيرا امىرلىگىندەگى مۇناي پورتىنا سوققى جاسادى دەپ ايىپتاپ، ونى «قاۋىپتى شيەلەنىسۋ» دەپ اتاعان.

ال يران بۇل ايىپتاۋلاردى جوققا شىعارىپ، ەگەر مۇنداي ارەكەتتەر جاسالسا، ونى اشىق مالىمدەيتىنىن ايتتى.

«ەپيكالىق اشۋ» وپەراتسياسى 28-اقپاندا باستالعان. سول كۇنى ا ق ش پەن يزرايل يرانعا ءبىرقاتار اۋە سوققىلارىن جاساعان. بۇعان جاۋاپ رەتىندە تەگەران الەمدىك مۇناي مەن سۇيىتىلعان تابيعي گاز جەتكىزىلىمىنىڭ شامامەن %20 ى وتەتىن ماڭىزدى سۋ جولىن - ورمۋز بۇعازىن بۇعاتتاعان.

ايتا كەتەيىك، بۇعان دەيىن ا ق ش ورمۋز بۇعازىنداعى شابۋىلدارعا بايلانىستى يرانمەن اتىستى توقتاتۋ تۋرالى كەلىسىمدى كۇشىندە قالدىرعانىن جازدىق.