يراندا ساۋدا ورتالىعىنداعى ورتتەن سەگىز ادام قازا تاپتى
استانا. KAZINFORM - يراننىڭ شاحريار قالاسىنداعى ساۋدا ورتالىعىندا بولعان ءورت سالدارىنان كەمىندە سەگىز ادام كوز جۇمدى، دەپ حابارلايدى يران مەملەكەتتىك تەلەارناسى.
مەملەكەتتىك تەلەارنانىڭ مالىمەتىنشە، قالا تەگەران ماڭىندا ورنالاسقان. تاعى 36 ادام ءتۇرلى دەڭگەيدە جاراقات العان، ولاردىڭ ءبىرقاتارى اۋرۋحاناعا جەتكىزىلگەن.
ءورت ءسوندىرىلىپ، قۇتقارۋ قىزمەتتەرى وقيعا ورنىندا سالداردى جويۋ جانە ۇيىندىلەردى ارشۋ جۇمىستارىن جۇرگىزىپ جاتىر. ماماندار عيمارات ىشىندە ادامداردىڭ قالىپ قويماعانىن تەكسەرىپ جاتىر.
الدىن الا مالىمەتتەرگە سايكەس، ءورتتىڭ شىعۋىنا ەلەكتر جۇيەسىندەگى اقاۋ نەمەسە قاۋىپسىزدىك تالاپتارىنىڭ ساقتالماۋى سەبەپ بولۋى مۇمكىن. الايدا ناقتى سەبەپتەر تەرگەۋ بارىسىندا انىقتالادى.
شاحريار پروكۋراتۋراسى ساۋدا ورتالىعىنىڭ قۇرىلىسىنا جاۋاپتى كومپانيا باسشىسىن قاماۋعا الۋ تۋرالى شەشىم شىعاردى. تەرگەۋ ورگاندارى ءورت قاۋىپسىزدىگى نورمالارىنىڭ ساقتالۋىن تەكسەرىپ جاتىر.
سوڭعى جىلدارى يراندا ساۋدا ورىندارى مەن وندىرىستىك نىساندارداعى ءورت وقيعالارى جيىلەگەنى بايقالادى. ساراپشىلار مۇنى قاۋىپسىزدىك تالاپتارىنىڭ جەتكىلىكتى دەڭگەيدە ساقتالماۋىمەن بايلانىستىرادى.
ەسكە سالا كەتسەك، كەشە وسكەمەندەگى كاسىپورىنداردىڭ بىرىندە جارىلىس بولدى.
سونىڭ سالدارىنان ەكى ادام قازا تاۋىپ، بەسەۋى زارداپ شەكتى.
سونداي-اق قىتايدا فەيەرۆەرك فابريكاسىنداعى جارىلىستان 21 ادام قازا تاۋىپ، 61 ادام زارداپ شەكتى.
