يران كورشى ەلدەردەگى اۋەجايلاردىڭ جۇمىسىن توقتاتاتىنىن ايتىپ، سەس كورسەتتى
استانا. KAZINFORM – ا ق ش يراننىڭ اۆياتسيا سالاسىنا قارسى سانكسيالاردى كۇشەيتكەن سوڭ، كەيبىر حالىقارالىق رەيستەر توقتاتىلعان. بۇل تەگەراننىڭ اشۋىن تۋدىرىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
23-قىركۇيەكتە يراننىڭ جوعارعى ۇلتتىق قاۋىپسىزدىك كەڭەسىنىڭ حاتشىسى موحسەن رەزاي كورشىلەس ەلدەر ا ق ش سانكسيالارى اياسىندا يراننىڭ رەيستەرىن قابىلداۋدان باس تارتسا، ولاردىڭ اۋەجايلارىنىڭ جۇمىسىنا كەدەرگى كەلتىرەتىنىن ايتىپ، سەس كورسەتتى. رەزاي IRINN مەملەكەتتىك تەلەارناسىنا بەرگەن سۇحباتىندا وسىنداي مالىمدەمە جاساعان.
- ەگەر قۇراما شتاتتاردى جاقتاساڭىزدار، ءبىز جاي قاراپ وتىرمايمىز. ەگەر كورشى ەلدەر ا ق ش- قا قوسىلىپ، يران رەيستەرىن توقتاتسا، ولاردىڭ اۋەجايلارى دا جابىلادى، - دەدى رەزاي.
ول تەگەران ناقتى نەنى جوسپارلاپ وتىرعانىن نەمەسە ەسكەرتۋ قاي ەلدەرگە قاتىستى ەكەنىن اشىپ ايتپادى.
بۇل مالىمدەمە ا ق ش قارجى ءمينيسترى سكوتت بەسسەنت يران اۆياتسياسىنا قارسى سانكسيالاردىڭ كەڭەيتىلگەنىن جاريالاعاننان كەيىن جاسالىپ وتىر. بەسسەنت شەتەلدىك اۋەجايلار جانە قىزمەت كورسەتۋ كومپانيالارىنا يراننىڭ ۇشاقتارىنا جانارماي قۇيۋعا، قىزمەت كورسەتۋگە نەمەسە رەيستەرىنە بيلەتتەر ساتۋعا تىيىم سالىنعانىن مالىمدەدى، ال تىيىمدى بۇزعاندار قايتالاما سانكسيالارعا ۇرىنىپ، دوللار جۇيەسىنەن قول ءۇزىپ قالاتىنىن ەسكەرتتى.
شەكتەۋلەر كۇشىنە ەنگەننەن كەيىن تەگەراننان باعدات پەن ماسكاتقا ۇشاتىن رەيستەر توقتاتىلدى. يراننىڭ اۆياتسيا بيلىگى يراك استاناسىنا باراتىن رەيستەردى ءان-نادجاف اۋەجايىنان ۇشىرۋ جونىندە كەلىسسوزدەر باستادى.
دەگەنمەن، كەيبىر حالىقارالىق باعىت توقتاعان جوق. يراندىق تاسىمالداۋشىلار قىتايعا، تۇركياعا، ارمەنياعا جانە ب ا ءا- گە تاڭدالعان رەيستى ۇشىرىپ وتىر.
رەزاي يران ۆاشينگتونمەن كەلىسسوزدەردى قايتا باستامايتىنىن جانە تەگەراننىڭ شارتتارى ورىندالمايىنشا، ورمۋز بۇعازىن اشپايتىنىن مالىمدەدى.
- ءبىزدىڭ شارتتارىمىز ورىندالمايىنشا، ورمۋز بۇعازى اشىلمايدى جانە كەلىسسوزدەر جۇرگىزىلمەيدى، - دەدى ول.
بۇعان دەيىن يران سوعىس قيمىلدارىن توقتاتۋدى، پورتتارىن قورشاۋدى جانە ەلگە قارسى شەكتەۋلەردى الىپ تاستاۋدى جانە شەتەلدەگى يراننىڭ مۇزداتىلعان اكتيۆتەرىن بۇعاتتاۋدى الىپ تاستاۋدى تالاپ ەتكەن بولاتىن.
ەسكە سالايىق، يران مەن امەريكا قۇراما شتاتتارى سەيسەنبى كۇنى ب ۇ ۇ باس اسسامبلەياسىنىڭ اياسىندا كەلىسسوزدەر جۇرگىزدى.
