يران ا ق ش-تىڭ پارسى شىعاناعىنداعى دەرەك ورتالىقتارىن جويامىز دەپ سەس كورسەتتى
استانا. KAZINFORM - تەگەران ا ق ش-پەن سوعىس ءورتى قايتا تۇتانسا، قانداي نىساندارعا سوققى جاسايتىنىن ناقتىلادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يراننىڭ جوعارعى ۇلتتىق قاۋىپسىزدىك كەڭەسىنىڭ حاتشىسى موحسەن رەزاي جاڭا اسكەري قاقتىعىستا ا ق ش-تىڭ پارسى شىعاناعىنداعى دەرەك ورتالىقتارى، جاساندى ينتەللەكت نىساندارى جانە كابەل ينفراقۇرىلىمى نىساناعا الىنۋى مۇمكىن ەكەنىن ايتتى.
ول بۇل تۋرالى يراننىڭ Press TV تەلەارناسىنا بەرگەن سۇحباتىندا مالىمدەدى. سۇحبات جەكسەنبى كۇنى ەفيرگە شىققان. IRNA اگەنتتىگى سۇحبات ءماتىنىن جاريالادى.
رەزايدىڭ ايتۋىنشا، بۇل نىساندار – ب ا ءا مەن ورمۋز بۇعازى ماڭىنداعى اكتيۆتەر، ولاردى تەگەران ءالى ءوز نىسانالارىنىڭ قاتارىنا قوسپاعان.
- قۇراما شتاتتاردىڭ ب ا ءا مەن ورمۋز بۇعازى ماڭىندا وتە قۇندى اكتيۆتەرى بار. ءبىز بۇل اكتيۆتەردى ءالى ءوز نىسانالارىمىزدىڭ قاتارىنا قوسقان جوقپىز. ءبىراق ەگەر سوعىس قايتا باستالسا، وسى كابەلدەردىڭ، دەرەكتەر ورتالىقتارىنىڭ، جاساندى ينتەللەكت جانە باسقا دا كوپتەگەن نىساننىڭ كوپشىلىگى جويىلادى، - دەدى ول.
رەزاي «ايماقتاعى امەريكا ەكونوميكاسىنىڭ جۇرەك قاعىسى» وسى ينفراقۇرىلىم نىساندارىنا بايلانىستى دەي وتىرىپ، اكتيۆتەردىڭ قۇنىن 2 تريلليون دوللاردان استام دەپ باعالادى.
ول سونداي-اق يران ا ق ش قايتا شابۋىل باستاسا، قوسىمشا اسكەري مۇمكىندىكتەردى قولدانۋعا دايىن ەكەنىن مالىمدەدى. ول تەگەران سوعىستىڭ العاشقى اپتاسىندا ودان ءارى ارەكەت ەتۋ نۇسقالارىن ساقتاۋ ءۇشىن ءوزىنىڭ تولىق الەۋەتىن ادەيى تومەندەتكەنىن تىلگە تيەك ەتتى.
- بۇگىندە، ەگەر تاعى ءبىر قاقتىعىس بولسا، ءبىز جاۋدى الدەقايدا اۋقىمدى ءارى كەشەندى جوسپارمەن قارسا الۋعا دايىنبىز، - دەدى رەزاي.
ۆاشينگتونمەن دەلدال ارقىلى بايلانىس ورناتىپ وتىرعان تەگەران تاراپى وسىلاي سەس كورسەتىپ وتىر. رەزايدىڭ ايتۋىنشا، سوڭعى ەكى ايدا ا ق ش پاكىستان، قاتار جانە يراك ارقىلى يرانمەن بايلانىس ورناتىپ، شامامەن ەكى اپتا بۇرىن يراننان كەلىسىمگە كەلۋ بويىنشا ۇسىنىستار سۇراعان.
رەزايدىڭ ايتۋىنشا، تەگەران قويعان جەتى شارت ورىندالسا، ا ق ش ءۇشىن ورمۋز بۇعازى اشىلىپ، كەلىسسوز باستالادى.
ول ۆاشينگتون كەيبىر تالاپقا كەلىسكەنىن، ال كەي تالاپقا بەرىلگەن جاۋاپتىڭ تۇسىنىكسىز بولىپ وتىرعانىن، سوعان بايلانىستى يران تاراپى ونى قاناعاتتانارلىقسىز دەپ سانايتىنىن مالىمدەدى.
بۇعان دەيىن ترامپ كونگرەسس سايلاۋىنا دەيىن يرانعا سوققى جاسامايتىنىن مالىمدەگەن بولاتىن.
كەشە تۇندە ورمۋز بۇعازىندا تاعى ءبىر مۇناي تانكەرى ميناعا سوعىلىپ، ورتەنگەن.
