يران ا ق ش- تى پارسى شىعاناعىن لاستادى دەپ ايىپتادى
استانا. KAZINFORM - تەگەران پارسى شىعاناعى مەن ومان تەڭىزىنە كەلتىرىلگەن ەكولوگيالىق زالال ءۇشىن وتەماقى تالاپ ەتۋگە نيەتتى، دەپ حابارلايدى Kazinform اگەنتتىگىنىڭ تاياۋ شىعىستاعى مەنشىكتى ءتىلشىسى.
يران س ءى م رەسمي وكىلى ەسمايل باگاي دۇيسەنبىدە ا ق ش اسكەري كۇشتەرىنىڭ قاتىسۋى جانە ۆاشينگتوننىڭ ايماقتا جۇرگىزگەن وپەراتسيالارى پارسى شىعاناعى مەن ومان تەڭىزى سۋلارىن كوپجىلدىق لاستانۋىنا اكەلدى دەپ كىنالادى، دەپ حابارلايدى IRNA.
- بۇل ەكولوگيالىق زالال ا ق ش- تىڭ اسكەري قاتىسۋى جانە ولاردىڭ سوڭعى بەس ونجىلدىقتا ايماقتا جۇرگىزگەن سوعىستارىنىڭ سالدارى. پارسى شىعاناعى مەن ومان تەڭىزىندە قورشاعان ورتاعا كەلتىرىلگەن زالال تەك سوڭعى سوعىسپەن عانا بايلانىستى ەمەس، - دەپ مالىمدەدى باگاي دۇيسەنبىدە وتكەن بريفينگتە.
ونىڭ ايتۋىنشا، قورشاعان ورتاعا كەلتىرىلگەن زالالدىڭ كولەمى تريلليونداعان دوللارعا جەتۋى مۇمكىن. يران بۇل ءۇشىن ا ق ش پەن باسقا تاراپتاردى جاۋاپكەرشىلىككە تارتۋعا نيەتتى.
س ءى م وكىلىنىڭ اتاپ وتۋىنشە، سوڭعى ەكى جىلدا ا ق ش پەن يزرايلدىڭ يرانعا جانە پارسى شىعاناعى ايماعىنداعى نىسانالارعا شابۋىلدارى سالدارىنان قورشاعان ورتاعا اسەر ارتقان.
ول لاستانۋدىڭ سالدارى تەك يرانعا ەمەس، سونىمەن قاتار ايماقتاعى باسقا مەملەكەتتەرگە دە اسەر ەتەتىنىن اتاپ ءوتتى.
بۇل مالىمدەمە جاقىندا ورمۋز بۇعازىندا مۇناي توگىلگەننەن كەيىن جاسالدى. وتكەن اپتادا مۇناي داعى يراننىڭ كەشم ارالىنىڭ جاعالاۋىنا جەتىپ، جاعاجايلار مەن ەكولوگيالىق تۇرعىدان سەزىمتال مانگر ورماندارىنا اسەر ەتتى.
باگاي سول كەزدە الدىن الا مالىمەتتەرگە سىلتەمە جاساي وتىرىپ لاستانۋ كوزى شەتەلدىك جۇك كەمەسى بولعانىن حابارلادى.
يران كەلتىرىلگەن زالال ءۇشىن وتەماقى تالاپ ەتتى. كەيىنىرەك ەل بيلىگى توگىلگەن مۇناي تولىعىمەن تازارتىلعانىن مالىمدەدى.
ناۋرىز ايىندا يرانداعى اۋە سوققىلارىنان كەيىن تەگەراندا «قارا جاڭبىر» جاۋىپ، اۋا لاستانعانىن جازدىق.
