يران ا ق ش-قا سوعىستى توقتاتۋدىڭ جەتى كۇندىك جوسپارىن ۇسىندى

يران سىرتقى ىستەر ءمينيسترى ابباس اراكچي ب ۇ ۇ باس اسسامبلەياسىنىڭ 81-سەسسياسى اياسىنداعى باسپا ءسوز ءماسليحاتىندا تەگەران باسشىلىعىنىڭ ۆاشينگتونعا جەتى كۇندىك جوسپار ۇسىنعانىن مالىمدەدى.

اراكچيدىڭ ايتۋىنشا، ۇسىنىس ا ق ش پەن يران اراسىندا ماۋسىم ايىندا قول جەتكىزىلگەن، الايدا كەيىن جۇزەگە اسپاي قالعان ءوزارا تۇسىنىستىك تۋرالى كەلىسىمدەگى مىندەتتەمەلەرگە ۇقساس. ۆاشينگتون ۇسىنىستى قابىلداعان جاعدايدا تەگەران ونى دەرەۋ جۇزەگە اسىرۋعا دايىن ەكەنىن بىلدىرگەن.

- ءبىز دەلدالدار ارقىلى ا ق ش- قا جوسپار ۇسىندىق. وندا بەلگىلى ءبىر تالاپتار ورىندالعان جاعدايدا جەتىنشى كۇننىڭ سوڭىندا ورمۋز بۇعازى اشىلىپ، كەلىسسوزدەر قايتا باستالاتىنى قاراستىرىلعان،- دەدى ابباس اراكچي.

جوسپار تالاپتارىنىڭ قاتارىندا جەتى كۇن ىشىندە بارلىق باعىتتاعى، سونىڭ ىشىندە ليۆانداعى اسكەري ءىس-قيمىلداردى توقتاتۋ بار. سونداي-اق يران ا ق ش- تان بۇعاتتالعان قارجى اكتيۆتەرىن بوساتۋدى، يران مۇنايىنا قاتىستى سانكتسيالاردى الىپ تاستاۋدى جانە تەڭىز بلوكاداسىن توقتاتۋدى تالاپ ەتىپ وتىر.

ۇسىنىستا بۇعاتتالعان يران قاراجاتىنىڭ كولەمى كەمىندە 12 ميلليارد دوللار ەكەنى ايتىلعان. وسى تالاپتار ورىندالعاننان كەيىن ورمۋز بۇعازىن قايتا اشىپ، يادرولىق باعدارلاما بويىنشا كەلىسسوزدەردى دەرەۋ باستاۋ كوزدەلگەن.

كەلىسسوزدەر بارىسىنان حاباردار امەريكالىق شەنەۋنىكتىڭ ايتۋىنشا، ۆاشينگتون دەلدالدار ارقىلى «وڭ ءارى كونسترۋكتيۆتى» كەلىسسوزدەر جۇرگىزىپ جاتىر. دەگەنمەن ا ق ش اكىمشىلىگى كەلىسىمگە كەلۋگە اسىقپايتىنىن بىلدىرگەن.

اراكچي كەلىسىمگە ا ق ش- تاعى ارالىق سايلاۋعا دەيىن قول جەتكىزىلگەنى دۇرىس بولاتىنىن دا ايتتى.

بۇعان دەيىن يران تاراپى قاتاردىڭ ارااعايىندىعىمەن ا ق ش- قا ءوز تالاپتارىن جەتكىزگەن بولاتىن. ولاردىڭ اراسىندا بارلىق باعىتتاعى سوعىستى توقتاتۋ، ا ق ش- تىڭ اسكەري ارەكەتتەرى مەن تەڭىز بلوكاداسىن دوعارۋ جانە يران اكتيۆتەرىن بوساتۋ تالاپتارى بار.

يران سىرتقى ىستەر ءمينيسترى نيۋ-يوركتەگى كەلىسسوزدەرىن 28-قىركۇيەككە دەيىن جالعاستىرادى.