يران اۋە كومپانيالارى ا ق ش سانكسيالارىنا بايلانىستى حالىقارالىق بىرنەشە رەيستى توقتاتتى
استانا. KAZINFORM - ۆاشينگتون يرانمەن جۇمىس ىستەيتىن شەتەلدىك اۋەجايلار مەن قىزمەت كورسەتۋشى كومپانيالارعا ەكىنشى رەتتىك سانكسيالار سالۋ قاۋپىن ءتوندىرىپ، ەلدىڭ اۆياتسيا سالاسىنا قىسىمدى كۇشەيتىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ا ق ش- تىڭ جاڭا شەكتەۋلەرى كۇشىنە ەنگەننەن كەيىن يران اۋە كومپانيالارى سارسەنبىدە حالىقارالىق رەيستەردىڭ ءبىر بولىگىن توقتاتتى. ب ا ق مالىمەتىنشە، تەگەراننىڭ باعداد جانە ماسكاتپەن اۋە قاتىناسى ءۇزىلدى.
يراك بيلىگى باعداد اۋەجايىندا يران اۋە كومپانيالارىنىڭ رەيستەرىن قابىلداۋدى توقتاتۋدى بۇيىردى. Reuters حابارلاۋىنشا، تاراپتار بۇل رەيستەردى يران قاجىلارى جيى باراتىن ەن-نادجاف اۋەجايىنا باعىتتاۋ ماسەلەسىن تالقىلاپ جاتىر.
يران ازاماتتىق اۆياتسيا ۇيىمىنىڭ وكىلى مادجيد احاۆان Tasnim اگەنتتىگىنە بەرگەن سۇحباتىندا باعداد پەن ماسكات اۋەجايلارى يران ۇشاقتارىن قابىلداۋدى توقتاتقانىن راستادى. قازىر يراك جانە ومان بيلىگىمەن كەلىسسوزدەر جالعاسىپ جاتىر.
AFP اگەنتتىگىنىڭ حابارلاۋىنشا، يراننان قاتار، گرۋزيا جانە ازەربايجانعا قاتىنايتىن اۋە رەيستەرى دە ۋاقىتشا توقتاتىلعان. تەگەرانداعى تۋريستىك كومپانيا وكىلى رەيس كەستەسىنىڭ تۇراقسىزدىعى مەن جاڭا رەيستەردىڭ توقتاتىلۋ قاۋپىنە بايلانىستى بيلەتتەر ساتىلىمىنا ۋاقىتشا شەكتەۋ قويىلعانىن ايتتى.
يراننىڭ حالىقارالىق اۋە قاتىناسى ازىرگە تولىق توقتاعان جوق. سارسەنبى كۇنى يراننىڭ Mahan Air اۋە كومپانياسىنا تيەسىلى ۇشاق اقش شەكتەۋلەرىنە قاراماستان، قىتايدىڭ گۋانچجوۋ قالاسىنا قوندى. بۇدان بولەك شاڭحاي، ىستانبۇل، ەرەۆان، ەن-نادجاف جانە دۋباي باعىتتارىنا رەيستەر جوسپارلانعان. قىتاي بيلىگى ا ق ش سانكسيالارىن زاڭسىز دەپ سانايتىنىن مالىمدەپ، ولاردى قولدانۋعا قارسىلىق ءبىلدىردى.
ا ق ش قارجى ءمينيسترى سكوتت بەسسەنت يران اۋە كومپانيالارىنا قىزمەت كورسەتەتىن شەتەلدىك كومپانيالار ا ق ش- تىڭ قارجى جۇيەسىنە قول جەتكىزۋ مۇمكىندىگىنەن ايىرىلۋى مۇمكىن ەكەنىن ەسكەرتكەن.
- ۇشاقتار قونعان جاعدايدا جانارماي قۇيۋعا، اۋەجاي قىزمەتتەرىن ۇسىنۋعا جانە بيلەت ساتۋعا بولمايدى. ايتپەسە، دوللارلىق قارجى جۇيەسىنەن شىعارىلاسىزدار، - دەدى ول.
يراننىڭ اۆياتسيا سالاسى كوپ جىلدان بەرى ا ق ش سانكسيالارىنىڭ قىسىمىندا كەلەدى.
ا ق ش باسقا مەملەكەتتەردىڭ اۋە كەڭىستىگىن يران ۇشاقتارى ءۇشىن تىكەلەي جابا المايدى. الايدا يران ۇشاقتارىنا قىزمەت كورسەتەتىن شەتەلدىك اۋەجايلار مەن كومپانيالارعا، سونىڭ ىشىندە جانارماي جەتكىزۋشىلەرگە، اۋەجاي قىزمەتتەرىنە جانە بيلەت ساتۋ جۇيەلەرىنە سانكسيا سالۋ قاۋپى يران اۋە كومپانيالارىنىڭ حالىقارالىق رەيستەردى ورىنداۋىنا ايتارلىقتاي كەدەرگى كەلتىرۋى مۇمكىن.
بۇعان دەيىن ترامپتىڭ يرانعا قاتىستى قاتاڭ مالىمدەمە جاساعانىن حابارلاعان بولاتىنبىز.
