ۇيقىڭىز قانباسا، يممۋنيتەت تومەندەيدى

  ساپالى ءومىر ءسۇرىپ، كوڭىل- كۇي كوتەرىڭكى، وقۋ مەن جۇمىس ناتيجەلى بولۋى ءۇشىن اعزاعا قاجەت دۇنيە-ۇيقى.

ءسىز قانشا ساعات ۇيىقتايسىز؟ نەشەدە ۇيىقتايسىز؟ ۋاقىتىندا ۇيىقتاۋدىڭ ماڭىزى تۋرالى «جىبەك جولى» ارناسىنداعى «ءبىزدىڭ دارىگەر» جوباسىنا كەلگەن ەندكورينولوگ دارىگەر ماحاببات يبراگيم قىزى ءتۇسىندىردى، دەپ حابارلايدى Kazinform.

ۇيقىنىڭ قانباۋىنان جۇرەك-قان تامىر اۋرۋلارى تۋىنداۋى مۇمكىن. سونىڭ كەسىرىنەن قانت ديابەتىنىڭ 2 ءتيپى مەن سەمىزدىك تۋىندايدى.

نەگىزىنەن ۇيقى قانباعان كەزدە اشتىق سەزىمىن تۋعىزاتىن گرەلين گورمونى تۇزىلەدى. سول سەبەپتى ادام مولشەردەن تىس تاماق جەپ قويادى. ال مەلاتونين - ۇيقى گورمونى. ول قاراڭعى تۇسكەندە تۇزىلەدى. مەلوتونين قان قىسىم مەن دەنە تەمپەراتۋراسىنىڭ تومەندەۋىنە سەپ بولىپ، اعزانى تىنىشتاندىرادى. ءبىراق ءبىز قاراڭعى تۇسكەن سوڭ ۇيدە جارىقپەن وتىرساق ونىڭ ءتۇزىلۋى باياۋلايدى. سوندىقتان مەلوتونين گورمونىنىڭ ورنىنا سترەسس گورمونى كورتيزول كوپ مولشەردە ءبولىنىپ ادامنىڭ ۇيقىسى قاشادى.

ەگەر ادام بەس ساعاتتان از ۇيىقتاسا، ۆيرۋستىق ينفەكتسيانى جۇقتىرۋ قاۋپى ارتادى. قالىپتى جاعدايدا ەرەسەكتەر 7-8 ساعات، ال بالالار 9-10 ساعات ۇيىقتاۋى قاجەت. بۇل ورتالىق جۇيكە جۇيەسىنىڭ جاسۋشالارىن قالپىنا كەلتىرىپ، يممۋنيتەتتى نىعايتادى.

باعدارلاما جۇرگىزۋشىسىنە ەندكورينولوگ دارىگەر ۇيقى قانباسا، ميدىڭ كەي بولىكتەرىنىڭ قىزمەتى ناشارلايتىنىن سونىڭ كەسىرىنەن ادام ويدى جۇيەلەي الماي، ءتىپتى كورۋ قابىلەتى دە تومەندەۋى مۇمكىندىگىن ايتتى.

«ۇيقى قانۋى ءۇشىن جاتار الدىندا اۋىر، مايلى تاماق جەمەڭىز، قاراڭعى جانە تىنىش جەردە ۇيىقتاڭىز. ۇيقىعا بەلگىلى ءبىر ۋاقىتتا جاتىپ، ءبىر ۋاقىتتا ويانۋدى ادەتكە اينالدىرىڭىز. ۇيقى الدىندا دالاعا شىعىپ سەرۋەندەۋ دە پايدالى. سونداي-اق ۇيقى الدىندا كەمى 1 ساعات گادجەت پايدالانباي، جاتىن بولمە تەمپەراتۋراسىن قاداعالاعان ابزال»، - دەيدى ماحاببات يبراگيم.