20:52, 12 - اقپان 2021 | GMT +5
ديماش قۇدايبەرگەننىڭ Youtube ارناسى «التىن باتىرماعا» يە بولدى
نۇر-سۇلتان. قازاقپارات - ديماش قۇدايبەرگەننىڭ Youtube ارناسى «التىن باتىرماعا» يە بولدى، دەپ حابارلايدى قازاقپارات.
«بۇگىن ءبىزدىڭ Youtube ارنامىزدا كورەرمەن سانى 1 ميلليوننان اسىپ، وسى جەلىنىڭ «التىن باتىرماسىن» الدىق. ەڭ الدىمەن كىشىگىرىم ونەرىمە باعا بەرىپ، «وسى بالانىڭ بولاشاعى جارقىن بولسىن» دەپ تىلەۋىمدى تىلەپ وتىرعان بۇكىل الەمدەگى تىڭدارماندارىمنىڭ ءارقايسىنا ەرەكشە العىس ايتقىم كەلەدى. سونداي- اق بىرگە جۇمىس ىستەپ جۇرگەن مەنەدجەرلەرىمە، شىعارماشىلىعىما اتسالىسىپ جۇرگەن جاندارعا ريزاشىلىعىمدى بىلدىرەمىن. ارينە، سونىمەن قاتار اتا- اناما، تۋعان-تۋىس، اعايىن-باۋىرىما، جەرلەستەرىمە راحمەت» دەپ اعىنان جارىلادى ۆيدەودا ديماش قۇدايبەرگەن.
ايتا كەتەيىك، ديماش قۇدايبەرگەننىڭ رەسمي Youtube ارناسى 2017-جىلدىڭ 27- قازانىندا جۇمىسىن باستاعان. قازىرگى تاڭدا ارناعا 1,2 ميلليون ادام جازىلعان. قارالىم سانى 150 ميلليونعا جۋىقتاعان.
