ينتەرنەت الاياقتارى اقمولالىقتىڭ دەپوزيتتەگى 5,5 ميلليون تەڭگەسىن شەشىپ الدى
كوكشەتاۋ. KAZINFORM - ينتەرنەت الاياقتارى 69 جاستاعى اقمولالىق زەينەتكەردىڭ دەپوزيت شوتىنداعى 5,5 ميلليون تەڭگەنى شەشىپ العان. الاياقتار قىلمىستىق اركەتىن جۇزەگە اسىرۋ ءۇشىن زەينەتكەرگە ءۇش رەت قانا تەلەفون شالعان.
اقمولا وبلىستىق پ د باسپا ءسوز قىزمەتىنىڭ مالىمەتىنشە، جابىرلەنۋشىگە الاياقتار العاش رەت 26-قاڭتاردا ساعات 12:00 شاماسىندا قوڭىراۋ شالعان. ءوزىن ۇيالى بايلانىس كومپانياسىنىڭ قىزمەتكەرى رەتىندە تانىستىرعان الاياق قازىرگى ۋاقىتتا ابونەنتتىك نومىرلەردى قايتا تىركەۋدەن ءوتىپ جاتقانىن جانە ءبىر ساعات ىشىندە پروتسەدۋرانى جۇرگىزۋ قاجەت ەكەنىن، ايتپەسە ءنومىر جۇمىس ىستەمەيتىنىن ايتىپ سەندىرگەن. ايەل شەتەلدەگى بالالارىمەن بايلانىسسىز قالماۋى ءۇشىن شارتتارعا بىردەن كەلىسكەن. س م س ارقىلى كەلگەن كودتى الاياقتارعا بەرگەن.
ارادا 15 مينۋت وتكەننەن كەيىن الاياقتار تاعى قوڭىراۋ شالعان. بۇل جولى وزدەرىن حالىق بانكىنىڭ وكىلى رەتىندە تانىستىرعان. ايەلدى قولدا بار بانك كارتاسىن جاڭارتۋ قاجەتتىگىن ايتىپ سەندىرەدى.
جابىرلەنۋشىنى وڭاي الداۋعا بولاتىنىن تۇسىنگەن الاياقتار ونىڭ تەلەفونىنا «كەنگۋرۋ» قوسىمشاسىن ورناتۋدى سۇرايدى. الاياقتاردىڭ ايتقاندارىن مۇدىرتپەستەن ورىنداعان ايەل دەپوزيت شوتىنداعى اقشاسىنان ايىرىلعانىن بىلمەدى. كەلەسى كۇنى عانا شوتىن تەكسەرگەن كەزدە دەپوزيتتەگى 5,5 ميلليون تەڭگە اقشاسىنىڭ ۇرلاعانىن ءتۇسىنىپ، پوليتسياعا ارىزداندى.
«قازىرگى ۋاقىتتا اقكول اۋداندىق پوليتسيا ءبولىمىنىڭ قىزمەتكەرلەرى وسى دەرەككە قاتىستى الاياقتاردى انىقتاۋ بويىنشا قاجەتتى جەدەل- ىزدەستىرۋ ءىس-شارالارىن جۇرگىزۋدە»، - دەدى ۆەدومستۆودان.
ايتا كەتسەك، بۇدان بۇرىن اقمولا وبلىسىندا ەر ادام جۇمىس ورنىنان 34 ميلليون تەڭگە جىمقىرعانىن جازعان ەدىك.
