ينۆەستورلار قانداي اكىمشىلىك كەدەرگىلەرگە ءجيى تاپ بولادى

استانا. KAZINFORM - باس پروكۋراتۋرا ينۆەتورلار جيى تاپ بولاتىن نەگىزگى اكىمشىلىگى كەدەرگىلەردى اتادى.

«پروكۋرورلاردىڭ نازارىندا 32 تريلليون تەڭگەدەن اساتىن 770 تەن استام جوبا بار. ولار - ءىرى ينۆەستورلار مەن جالپىۇلتتىق پۋلدىڭ جوبالارى»، - دەپ اتاپ وتەدى باس پروكۋراتۋرادان اگەنتتىكتىڭ رەسمي ساۋالىنا وراي.

قاداعالاۋشى ورگاننىڭ مالىمەتىنشە، پروكۋرورلىق سۇيەمەلدەۋدىڭ بارىسىندا ينۆەستورلار جيى تاپ بولاتىن مىناداي اكىمشىلىك كەدەرگىلەر انىقتالعان:

- جەر ماسەلەلەرى بويىنشا شەشىمدەر قابىلداۋ كەزىندەگى كۇردەلىلىك جانە ارتىق فورمالدىلىق (ونىڭ ىشىندە مەنشىك قۇقىعىن انىقتاۋداعى تۇسىنىكسىزدىك) - 38 پايىز؛

- ينفراقۇرىلىمنىڭ بولماۋى نەمەسە قولجەتىمسىزدىگى - 27 پايىز؛

- رۇقسات بەرۋ قۇجاتتارىن الۋ جانە شەشىمدەر قابىلداۋ بارىسىندا شىعارىلعان شەشىمدەردىڭ اۋرە-سارساڭدىعى مەن كەلىسپەۋشىلىگى - 15 پايىز؛

- سالىق سالۋ جۇيەسىندەگى وزگەرىستەردىڭ بولجامسىزدىعى جانە سالىقتىق باقىلاۋدى جۇرگىزۋدىڭ ءارتۇرلى تاجىريبەلەرى - 10 پايىز.

«بۇلاردىڭ باسىم كوپشىلىگى جاساندى جانە اتالعان ماسەلەلەردىڭ ءارقايسىسىنىڭ وسۋ/تومەندەۋ دارەجەسى مەملەكەتتىك اپپاراتتىڭ ولاردى باقىلاۋ جانە جويۋ قابىلەتىنە بايلانىستى. وسى تۇرعىدا «ينۆەستورلارعا قاتىستى پروكۋرورلىق سۇزگى» (تەكسەرۋلەردى تاعايىنداۋ، اكىمشىلىك وندىرىستەردى قوزعاۋ، شەكتەۋلەردى قولدانۋ، رۇقساتتاردى بەرۋدەن باس تارتۋ جانە ۇزارتۋ تۋرالى مەملەكەتتىك ورگانداردىڭ شەشىمدەرىن پروكۋرورلارمەن كەلىسۋ) ءوزىنىڭ تيىمدىلىگىن كورسەتتى»، - دەدى پروكۋراتۋرادان.