گيننەستىڭ رەكوردتار كىتابىنا ەنگەن ەڭ كىشكەنتاي تۇرمە جايلى نە بىلەمىز

استانا. KAZINFORM - فرانسيا مەن انگليا اراسىندا ورنالاسقان سارك ارالىندا 1856 -جىلى سالىنعان الەمدەگى ەڭ كىشكەنتاي تۇرمە بار. ءالى كۇنگە دەيىن جۇمىس ىستەيتىن نىساندا ەكى كامەرا تىركەلگەن.

سارك ارالىندا جول، كوشە شامدارى جوق. ءتىپتى، ءبىر دە ءبىر كولىك تە تىركەلمەگەن. ءبىراق اياداي عانا تۇرمە ءالى كۇنگە دەيىن جۇمىس ىستەپ تۇر.

ونىڭ ءبىر كامەراسىنىڭ كولەمى - 1,8 م ح 1,8 م بولسا، ەكىنشىسى - 1,8 م ح 2,4 م تەڭ.

مۇندا اعاش تاقتايشالاردان جاسالعان شاعىن كەرەۋەت پەن جۇقا ماتراس عانا بار.

بۇگىندە تۇرمەگە جارىق پەن جىلۋ تارتىلعان، ءبىراق عيماراتتىڭ تەرەزەسى جوق.

تۇتقىنداردى شاعىن تۇرمەدە رەسمي تۇردە ەكى كۇن عانا ۇستاۋعا بولادى. كەيىن ولار كورشى ورنالاسقان گەرنسي ارالىنداعى ۇلكەن تۇرمەگە اۋىستىرىلۋى كەرەك.

ۇزىندىعى 5 شاقىرىمعا تاياۋ جانە ەنى 1,6 شاقىرىم بولاتىن سارك ارالىنىڭ وزىندە 600 دەن از ادام مەكەن ەتەدى ەكەن.

ارالدىڭ قۇقىق قورعاۋ ورگاندارى قىلمىس تۋرالى حابارلامالاردى سيرەك الادى.

دەسە دە، شاعىن تۇرمەگە جەرگىلىكتى ماس تۇرعىندار مەن ءتارتىپ بۇزعان تۋريستەر قامالاتىن كورىنەدى.

اۆتور
ورالحان قوجانوۆ