گيننەستىڭ قازاقستان تۋرالى ەڭ بىرەگەي رەكوردتارى

استانا. KAZINFORM - بۇگىن - گيننەستىڭ دۇنيەجۇزىلىك رەكوردتار كۇنى. وسىعان بايلانىستى Kazinform قازاقستان تۋرالى رەسمي تىركەلگەن ەڭ بىرەگەي رەكوردتارعا شولۋ ۇسىنادى.

تەڭىزگە شىعار تۋرا جولى جوق ەڭ ءىرى مەملەكەت

قازاقستان اۋماعىنىڭ كولەمى بويىنشا الەمدە توعىزىنشى ورىنداعى ەل ەكەنى، اۋماعىنىڭ كولەمى 2,7 ميلليون شارشى شاقىرىمدى الىپ جاتقانى بەلگىلى. گيننەستىڭ رەكوردتارىنا ەلىمىز وسىنشا اۋماعى بولا تۇرىپ تەڭىزگە شىعار تۋرا جولى جوق ەڭ ءىرى مەملەكەت رەتىندە تىركەلگەن. جالپى قازاقستان رەسەي، قىتاي، وزبەكستان، قىرعىزستان، تۇرىكمەنستان ەلدەرىمەن شەكتەسىپ تۇر. دەگەنمەن، قازاقستان اۋماعىنا الەمدەگى ەڭ ءىرى كول سانالاتىن كاسپيدىڭ ءبىر بولىگى ەنىپ جاتىر.

ەڭ دارحان قۇرعاق دالا قازاقستانداعى قۇرعاق دالانىڭ اۋقىمى 804500 شارشى شاقىرىمعا جايىلعان. سوندىقتان ەلىمىزدى الەم ەڭ ءىرى قۇرعاق دالاسى بار مەملەكەت دەپ بىلەدى. ورال تاۋىنان التايعا دەيىنگى اۋماققا سوزىلىپ جاتقان دارحان دالانىڭ ءتوسىن 1950-جىلدارداعى تىڭ يگەرۋگە دەيىن مال مەن ەڭ ەركىن جايلاپ كەلدى.

بوكستاعى «قازاق سالماعى»

2016-جىلى برازيليانىڭ ريو-دە-جونەيرو قالاسىندا وتكەن جازعى وليمپيادا ويىندارىندا 69 كەلى سالماقتا ونەر كورسەتكەن بوكسشى دانيار ەلەۋسىنوۆ التىن مەدال يەلەندى. وسىلايشا باقتيار ارتايەۆتىڭ 2004-جىلعى، باقىت سارسەكبايەۆتىڭ 2008-جىلعى، سەرىك ساپيەۆتىڭ 2008-جىلعى جەتىستىگىن قايتالادى. قاتارىنان 4 وليمپيادادا ءبىر سالماقتان 4 «التىن» العان قازاقستان بوكسشىلارىنىڭ جەتىستىگىنەن كەيىن 69 كەلى سالماقتى سپورت ساراپشىلارى بوكستاعى «قازاق سالماعى» دەپ اتاپ كەتتى. بۇل دا قازاقستان تۋرالى رەسمي تىركەلگەن ەرەكشە رەكوردتىڭ بىرىنە جاتادى. بليتس جارىسىندا ەڭ جاس الەم چەمپيونى اتانعان شاحماتشى ءبيبىسارا اساۋبايەۆا 2021-جىلى پولشا استاناسىندا شاحماتتىڭ ايەلدەر اراسىنداعى بليتس جارىسىندا الەم چەمپيونى اتانعان كەزدە 17 جاس 307 كۇنگە تولعان. وسىلايشا ول اتالعان سايىس تۇرىنەن الەمنىڭ ەڭ جاس چەمپيون بويجەتكەنى اتاندى.

ەڭ الىپ باۋىرساق

2014-جىلى «ەرا» تەلەارناسى (قازىرگى 7-ارنا) الماتىدا الەمدەگى سالماعى 856 كيلوگرام بولاتىن ەڭ الىپ باۋىرساق ءپىسىرىپ، جۇرتتى وزدەرىنە قاراتتى. بۇل رەكورد 2024-جىلى تاعى بۇزىلدى. قوستاناي وبلىسىنداعى «باۋىرساق Fest» فەستيۆالىندە 2339 كيلوگرام 650 گرام پىسىرلگەن بولاتىن.

ەڭ كوپۇلتتى وركەستر

2022-جىلدىڭ 6-قىركۇيەگىندە استاناداعى بەيبىتشىلىك جانە كەلىسىم سارايىندا 51 ۇلتتىڭ وكىلى ءبىر وركەستردىڭ قۇرامىندا ساز ويناپ تاعى ءبىر ەرەكشە رەكوردتى تىركەدى. بۇل قازاقستان حالقىنىڭ بىرلىگىن كورسەتۋ ءۇشىن ۇيىمداستىرىلعان ءىس-شارا بولاتىن.

تۇنگى سىرعاناققا ارنالعان ەڭ بيىك شاڭعى شاتقالى

شىمبۇلاق شاڭعى شاتقالى الەم بويىنشا تۇنگى سىرعاناققا ارنالعان ەڭ بيىك شاڭعى شاتقالى بولىپ ەسەپتەلەدى - تەڭىز دەڭگەيىنەن 2300 مەتر بيىكتە جاتىر.