يۋن سوك ەل يمپيچمەنت تىڭداۋىنا قاتىستى

استانا. KAZINFORM — قاماۋعا الىنعان وڭتۇستىك كورەيا پرەزيدەنتى يۋن سوك ەل سەيسەنبى كۇنى اسكەري جاعداي ەنگىزگەنى ءۇشىن وعان جاريالانعان يمپيچمەنتتى قاراۋعا ارنالعان تىڭداۋعا قاتىستى، دەپ حابارلايدى Yonhap.

Юн Сок Ёль
Фото: Yonhap

ساعات 14:00 دە يۋن سوك ەل ءۇشىنشى سوت وتىرىسىنا قاتىسۋ ءۇشىن سوت زالىنا كىردى.

ونىڭ مىڭداعان جاقتاستارى كونستيتۋتسيالىق سوتتىڭ الدىنا جينالدى، دەپ حابارلايدى Yonhap.

ول يمپيچمەنت بويىنشا سوتقا ءوزى قاتىسقان تۇڭعىش پرەزيدەنت بولدى. بۇعان دەيىن بۇرىنعى پرەزيدەنتتەر نو مۋ حەن مەن پاك كىن حە سوت وتىرىستارىنا قاتىسپاعان.

2024-جىلى 14-جەلتوقساندا ۇلتتىق اسسامبلەيا (پارلامەنت) يۋن سوك ەلگە يمپيچمەنت جاريالادى. وعان سوعىس جاعدايىن ەنگىزۋ ارقىلى بۇلىك شىعارۋعا ارەكەتتەندى جانە بيلىكتى اسىرا پايدالاندى دەگەن ايىپ تاعىلىپ، قىزمەتىنەن ۋاقىتشا شەتتەتىلدى.

14-جەلتوقساندا سوت باستالعاننان باستاپ يمپيچمەنتتى قولداۋ نەمەسە قابىلداماۋ تۋرالى شەشىم قابىلداۋعا 180 كۇن قالدى.

ەگەر يمپيچمەنت ماقۇلدانسا، يۋن سوك ەل قىزمەتىنەن شەتتەتىلىپ، 60 كۇن ىشىندە كەزەكتەن تىس پرەزيدەنت سايلاۋى وتەدى. ەگەر يمپيچمەنت قابىلدانباسا، ول قايتا قىزمەتكە الىنادى.

ايتا كەتەيىك، يۋن سوك ەلگە يمپيچمەنت جاريالاۋ ءىسى بويىنشا ءبىرىنشى تىڭداۋ 4 مينۋتتان كەيىن اياقتالدى.

سونىمەن قاتار، يۋن سوك ەل الەۋمەتتىك جەلىدە ءوز قولىمەن جازعان مالىمدەمەسىن جاريالاپ، وندا اسكەري جاعداي - قىلمىس ەمەس ەكەنىن اتاپ ءوتتى.

سوڭعى جاڭالىقتار