يەمەندىك حۋسيتتەر ا ق ش- تىڭ سانا مەن ونىڭ ماڭىنداعى اۋداندارعا 10 سوققى جاساعانىن حابارلادى
استانا. KAZINFORM - ءبىرقاتار اۋە سوققىسىنان 16 ادام زارداپ شەكتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يەمەندىك حۋسيتتەر ا ق ش- تى دۇيسەنبىگە قاراعان ءتۇنى ەل استاناسى سانا مەن ونىڭ اينالاسىنا 10عا جۋىق سوققى بەردى دەپ ايىپتادى.
يەمەندىك Al Masirah باسىلىمىنىڭ حابارلاۋىنشا، سوڭعى شابۋىلدار ءال- دجاۋف پروۆينتسياسىنداعى حاب جانە ەش- شااف اۋداندارى، ساناداعى اتتان اۋدانى جانە ماريبتەگى راگۆان اۋدانىنا باعىتتالعان.
حۋسيتتەرمەن بايلانىسى بار Sabا اقپارات اگەنتتىگىنىڭ حابارلاۋىنشا، ەكى شابۋىل ەل استاناسىنداعى ارباين كوشەسىندە جانە بىرەۋى اۋەجايعا باراتىن جولدا جاسالعان. ا ق ش سوققى جاسادى دەپ ايىپتالىپ جاتىر.
يەمەن ۇكىمەتىنىڭ حۋسيتتەر باقىلاۋىنداعى دەنساۋلىق ساقتاۋ مينيسترلىگىنىڭ مالىمەتىنشە، ساۆان ايماعىنداعى شابۋىلدان 16 ادام جارالانعان.
سوققىلار يزرايل پرەمەر- ءمينيسترى بينيامين نەتانياحۋ حۋسيتتەرگە قارسى جاۋاپ قايتارۋعا جانە يرانعا قارسى شارا قولدانۋعا ۋادە بەرگەننەن كەيىن جاسالدى. يزرايل پرەمەر- ءمينيسترىنىڭ مالىمدەمەسى حۋسيتتەر تەل- اۆيۆتەگى بەن گۋريون اۋەجايىنا بالليستيكالىق زىمىرانمەن شابۋىل جاساعاننان كەيىن بىرنەشە ساعات وتكەن سوڭ جاسالدى.
سالدارىنان حالىقارالىق رەيستەر توقتاتىلىپ، التى ادام زارداپ شەكتى.
بىرنەشە ساعاتتان كەيىن حۋسيتتەر يزرايل ارمياسىنىڭ گازا سەكتورىنداعى «باسقىنشىلىق سوعىسىن» كەڭەيتۋىنە جاۋاپ رەتىندە ونىڭ اۋەجايلارىن نىساناعا الىپ، يزرايلگە «اۋە بلوكاداسىن» سالۋعا تىرىساتىندارىن ايتتى جانە اۋە كومپانيالارىن رەيستەرىن توقتاتۋعا شاقىردى.
ناۋرىز ايىنان باستاپ ا ق ش اسكەرى يەمەندەگى اۋە شابۋىلدارىن كۇشەيتتى.
