فينليانديا جالعىزباستى شەتەلدىكتەردى تەگىن ساياحاتقا شاقىرادى

Tengri Travel باعدارلاماعا كىمدەر قاتىسا الاتىنىن جانە ءوتىنىمدى قالاي بەرۋگە بولاتىنىن انىقتادى، دەپ حابارلايدى Massaget.kz.

ساياحات تۋرالى نە بەلگىلى؟

Finnish Dinner Date باعدارلاماسىن فينليانديانىڭ ءتۋريزمدى ىلگەرىلەتۋ جونىندەگى Visit Finland اگەنتتىگى قولعا العان. 2027-جىلدىڭ اقپانىندا ۇيىمداستىرۋشىلار الەمنىڭ تۇكپىر-تۇكپىرىنەن 16 بويداق ادامدى ەلگە شاقىرۋدى جوسپارلاپ وتىر.

ساپار 9-19 اقپان ارالىعىندا وتەدى. قاتىسۋشىلار ەكى توپقا بولىنەدى: ءبىرى حەلسينكيگە، ەكىنشىسى فينليانديانىڭ كولدى ولكەسىندە ورنالاسقان تامپەرەگە بارادى. ناقتى قاي قالاعا باراتىنى قاتىسۋ راستالعاننان كەيىن بەلگىلى بولادى.

باعدارلاما اياسىندا فين مادەنيەتىمەن، جەرگىلىكتى اسحانامەن تانىسۋ جانە كەشكى اس ۇستىندەگى توپتىق تانىسۋ قاراستىرىلعان. ءبىر ۇستەل باسىندا سەگىز شەتەلدىك ساياحاتشى مەن فينليانديانىڭ وتباسىن قۇرماعان ەكى جەرگىلىكتى تۇرعىنى باس قوسادى.

حەلسينكيدەگى كەشكى اس ءمازىرىن Savoy كافەسىنىڭ باس اسپازى ادەل كيننۋنەن دايىندايدى، ال تامپەرەدە - ەل نامىسىن حالىقارالىق Bocuse d'Or اسپازدىق بايقاۋىندا قورعاعان گەنري تيككانەن ازىرلەيدى.

ۇيىمداستىرۋشىلار نەگىزگى شىعىنداردى: اۋەبيلەتتەردى، تۇرۋدى، تاماقتانۋدى جانە جوسپارلانعان ءىس-شارالارعا قاتىسۋ اقىسىن ءوز موينىنا الۋعا ۋادە بەرەدى.

كىمدەر قاتىسا الادى؟

ءوتىنىمدى فينليانديادان تىس جەردە تۇراتىن، 18 جاستان اسقان بويداق جاندار بەرە الادى.

ول ءۇشىن اعىلشىن تىلىندە ۆيدەو ءتۇسىرىپ: «كەشكى اس ۇستىندەگى تانىسۋ ءۇشىن نە دايىندار ەدىڭىز جانە نەگە؟» دەگەن سۇراققا جاۋاپ بەرۋ قاجەت.

سودان كەيىن روليكتى Instagram, TikTok نەمەسە YouTube جەلىلەرىندە #FinnishDinnerDate حەشتەگىمەن جاريالاپ، Visit Finland رەسمي اككاۋنتىن بەلگىلەۋ كەرەك. سودان سوڭ قاتىسۋشىلار FinnishDinnerDate.com سايتىندا فورما تولتىرىپ، ۆيدەونىڭ سىلتەمەسىن تىركەۋى ءتيىس.

بۇل رەتتە Instagram جانە TikTok اككاۋنتتارى اشىق بولۋى شارت. ەگەر قاتىسۋشى روليكتى جالپىعا بىردەي جاريالاعىسى كەلمەسە، ونى YouTube-كە "سىلتەمە بويىنشا قولجەتىمدى" (access by link) ەتىپ جۇكتەپ، ۇيىمداستىرۋشىلارعا سىلتەمەسىن جىبەرە الادى.

ناتيجە قاشان جاريالانادى؟

ءوتىنىم قابىلداۋ 2026 -جىلدىڭ 10-قاراشاسىندا فينليانديا ۋاقىتىمەن 11:59 دا (استانا ۋاقىتىمەن 14:59 دا) اياقتالادى. ىرىكتەۋدەن وتكەن 16 قاتىسۋشىنىڭ ەسىمى 1-جەلتوقساندا Visit Finland-تىڭ Instagram جانە TikTok-تاعى رەسمي پاراقشالارىندا جاريالانادى.