يلون ماسكتىڭ X الەۋمەتتىك جەلىسىنە جازىلۋ ەكى ەلدە اقىلى بولدى

әлеуметтік желі
Фото: Фото: Kazinform агенттігі

بۇرىن Twitter دەپ اتالعان X الەۋمەتتىك جەلىسى جاڭا پايدالانۋشىلاردان نەگىزگى فۋنكتسيالارعا قول جەتكىزۋ ءۇشىن جىلىنا 1 دوللار تولەم الا باستادى. Kazinform بۇل تۋرالى The Guardian باسىلىمىنا سىلتەمە جاساپ حابارلايدى.

الەۋمەتتىك جەلى قىزمەتتەرىن پايدالانعانى ءۇشىن تولەم ازىرگە سىناق مەرزىم اياسىندا جاڭا زەلانديا مەن فيليپپيندە عانا ەنگىزىلگەن.

اقىلى مۇمكىندىكتەرگە X - تە جازۋ، رەتۆيت جاساۋ، ياعني بىرەۋدىڭ نەمەسە ءوزىنىڭ ءتۆيتىن قايتا جاريالاۋ، ءلۇپىل باسۋ جانە حابارلامالارعا جاۋاپ بەرۋ كىرەدى. ابونەنتتىك تولەمنەن باس تارتقاندار تەك جاريالانىمداردى وقي الادى، بەينەلەردى كورە الادى جانە اككاۋنتتارعا جازىلا الادى.

پلاتفورمانىڭ مالىمدەۋىنشە، بۇل تولەم الەۋمەتتىك جەلىدە سپام مەن بۇرمالاۋدى ازايتۋ، سونداي- اق بوت بەلسەندىلىگىن ازايتۋ ءۇشىن ەنگىزىلگەن.

X يەسى يلون ماسك نەگىزگى مۇمكىندىكتەرى جوق تەك وقۋعا ارنالعان تىركەلگىلەردى ءالى دە تەگىن جاساۋعا بولاتىنىن ايتقانىمەن، جاڭا زەلانديا مەن فيليپپيندەگى جاڭا پايدالانۋشىلار دا تەلەفون ءنومىرىن راستاۋى ءتيىس.

وتكەن ايدا X، Tesla جانە SpaceX باسشىسى X ءتىڭ بارلىق پايدالانۋشىلارى ەندى جەلىگە كىرۋ ءۇشىن اقى تولەۋى مۇمكىن ەكەنىن ايتتى.

ماسكتىڭ پىكىرىنشە، جاڭا پايدالانۋشىلاردان اقى الۋ تۋرالى شەشىم جارنامادان تۇسەتىن تابىسقا بالاما بولۋى مۇمكىن. ول X «بارلىق نارسەگە» ، سونىڭ ىشىندە تولەم قىزمەتتەرىنە ارنالعان قوسىمشاعا اينالادى دەپ سەندىرەدى. ماسك Twitter الەۋمەتتىك جەلىسىن ساتىپ العاننان كەيىن ونىڭ جارنامادان تۇسكەن تابىسى %60 عا تومەندەدى.

سوڭعى جاڭالىقتار