يلون ماسك سايلاۋ كۇنىنەن بەرى ترامپتىڭ رەزيدەنتسياسىندا تۇرىپ جاتىر — New York Times

استانا. KAZINFORM — دەرەككوزدەردىڭ حابارلاۋىنشا، ماسك دونالد ترامپتىڭ جەكە رەزيدەنتسياسى ورنالاسقان مار-ا-لاگو اۋماعىنداعى كوتتەدجدەردىڭ ءبىرىن جالعا العان، دەپ حابارلايدى Kazinform The New York Times-قا سىلتەمە جاساپ.

ول تۇرعان كوتتەدج Banyan دەپ اتالادى، پرەزيدەنت ۇيىنەن بىرنەشە ءجۇز فۋت قاشىقتىقتا ورنالاسقان. سول اۋماقتا تۇرۋ ماسكقا ترامپتىڭ كەشكى استارىنا قاتىسۋعا مۇمكىندىك بەردى: ماسەلەن، جاقىن ارادا ول Amazon نەگىزىن قالاۋشى دجەفف بەزوسپەن كەشكى استى بىرگە ىشكەن.

ماسك — سايلانعان پرەزيدەنتتىڭ مار-ا-لاگو مەنشىگىندە تۇرىپ جۇرگەن جاقىن ورتاسىنىڭ جالعىز مۇشەسى ەمەس. دەرەككوزدىڭ مالىمەتىنشە، كوتتەدجدەردىڭ بىرىندە بولاشاق ۆيتسە-پرەزيدەنت دجەي دي ۆەنس تە قالعان.

ترامپ الەمدەگى ەڭ باي ادام ماسكتىڭ مار-ا-لاگوداعى تۇرعىن اۋدانداردىڭ ءبىرىن «جالداپ جاتقانىن» ماقتان ەتتى، دەپ جازدى NYT.

گازەتتىڭ جازۋىنشا، ماسك كوتتەدجگە قانشا تولەيتىنى بەلگىسىز، ونى جالداۋ ادەتتە ءبىر تۇنگە كەمىندە 2000 دوللار تۇرادى. الايدا ادەتتە قوناقتارعا تولەم شوت سوڭعى كۇنى جىبەرىلەدى. وسىلايشا، ترامپ ماسكقا شوت بەرمەۋى نەمەسە سومانى ازايتۋى ابدەن مۇمكىن.

يلون ماسك سايلاۋ كۇنىنەن بەرى كوتتەدجدە تۇرىپ، ناتيجەلەردى ترامپپەن بىرگە باقىلاپ كەلگەن. ول سول اۋماقتان روجدەستۆو مەرەكەسىنە جاقىن كۇندەرى كەتىپ، جاقىن كۇندەرى قايتا ورالادى دەپ كۇتىلىپ وتىر، دەپ حابارلايدى New York Times.

ەسكە سالا كەتسەك، Business Insider JetSpy كومەگىمەن يلون ماسكتىڭ جەكە رەاكتيۆتى رەيستەرىنە تالداۋ جاسالدى. جاڭالىقتار پورتالىنىڭ مالىمەتىنشە، امەريكالىق ميللياردەردىڭ ەكى Gulfstream ۇشاعى اعىمداعى جىلدىڭ قاڭتار ايىنان جەلتوقسان ايىنىڭ ورتاسىنا دەيىن بارلىعى 355 رەيس جاساعان.