يلون ماسك ترامپتىڭ «سۋپەرينتەللەكت» تۋرالى مالىمدەمەسىنەن كەيىن SpaceXAI اتاۋىن وزگەرتەدى
استانا. قازاقپارات - SpaceX كومپانياسىنىڭ باس ديرەكتورى يلون ماسك ا ق ش پرەزيدەنتى دونالد ترامپ «جاساندى ينتەللەكت» تەرمينىنىڭ ورنىنا «سۋپەرينتەللەكت» تەرمينىن قولدانۋدى ۇسىنعاننان كەيىن SpaceXAI بولىمشەسىنىڭ اتاۋىن SpaceXSI دەپ وزگەرتەتىنىن جاريالادى، دەپ حابارلايدى Reuters اگەنتتىگى.
X الەۋمەتتىك جەلىسىنىڭ قولدانۋشىسى «SpaceXAI اتاۋى SpaceXSI دەپ وزگەرۋى مۇمكىن بە؟» دەگەن سۇراققا بەرگەن جاۋابىندا ماسك وسىنداي جوسپارى بارىن ايتقان.
- ءيا، ءبىز وزگەرىس ەنگىزەمىز، - دەپ جازدى ماسك.
X الەۋمەتتىك جەلى پلاتفورماسىنداعى SpaceXAI اككاۋنتىنىڭ اتاۋى ءالى وزگەرگەن جوق. ماسك سونىمەن قاتار الداعى وزگەرىس تۋرالى قوسىمشا مالىمەت بولىسپەدى جانە بۇل وزگەرىس قاشان بولاتىنىن دا اشىپ ايتپادى.
SpaceXAI ماسەلەگە قاتىستى Reuters ءتىڭ ساۋالىنا بىردەن جاۋاپ بەرمەدى.
وتكەن ايدا ب ۇ ۇ باس اسسامبلەياسىندا سويلەگەن سوزىندە ترامپ جاساندى ينتەللەكتىنىڭ اتاۋىن وزگەرتۋدى ۇسىنعان بولاتىن.
- وسى ساتتەن باستاپ قۇراما شتاتتاردىڭ بارلىق قۇجاتىندا «جاساندى» ءسوزىنىڭ ورنىنا، «سۋپەر» تەرمينى قولدانىلادى، ياعني «سۋپەرينتەللەكت» دەپ جازىلادى. بۇكىل الەمنىڭ قۇجاتتارى دا وسىلاي وزگەرتىلەدى دەپ ءۇمىت ارتامىن، - دەدى ترامپ.
ەسكە سالا كەتەيىك، ترامپ ا ق ش ۇكىمەتىنىڭ قۇجاتتارىندا جاساندى ينتەللەكتىنى «سۋپەرينتەللەكت» دەپ وزگەرتتى.
سونداي-اق يلون ماسك دونالد ترامپ اكىمشىلىگىمەن قايتادان ىنتىماقتاستىق ورناتاتىنى حابارلانعان. ول پەنتاگوننىڭ «مەريديان» اتتى جاڭا جوباسىنا پالمەر لاكي جانە نيۋت گينگريچپەن بىرگە تەڭ ءتوراعالىق ەتەدى.
