ىشكى ىستەر مينيسترلىگىنىڭ جوعارى وقۋ ورىندارىنا ءتۇسۋ ءۇشىن قانداي تالاپتار قويىلادى

استانا. KAZINFORM - ىشكى ىستەر مينيسترلىگىنە قاراستى جوعارى وقۋ ورىندارىندا وقىپ، قۇقىقتىق ورگانداردا قىزمەت ەتكىسى كەلەتىن تالاپكەرلەرگە ارنالعان ەرەجەلەر بار. تالاپتارمەن تولىعىراق ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ تانىستىردى.

«مينيسترلىكتىڭ جوعارى وقۋ ورىندارىنا ىشكى ىستەر ورگاندارىنىڭ قىزمەتكەرلەرىنە قويىلاتىن تالاپتارعا ساي كەلەتىن، اسكەري قىزمەتكە جانە وقۋعا دەنساۋلىعى جارامدى جاستار قابىلدانادى.

وقۋعا تاپسىرۋ ءۇشىن، ماۋسىم ايىنا دەيىن پوليتسيا بولىمدەرىنىڭ كادر قىزمەتىنە، تۇرعىلىقتى جەرى بويىنشا قىلمىستىق-اتقارۋ جۇيەسى دەپارتامەنتىنە نەمەسە وقۋ ورنىنىڭ سايتىنا ءوتىنىش بەرەدى»، - دەدى شىڭعىس الەكەشيەۆ ۆەدومستۆودا وتكەن ونلاين بريفينگىدە.

سونداي-اق، تالاپكەر مەديتسينالىق جانە پسيحوفيزيولوگيالىق كۋالاندىرۋدان، پوليگرافتا تەكسەرۋدەن ءوتۋى كەرەك.

«ۇلتتىق ءبىرىڭعاي تەستىلەۋدە كەمىندە 50 بال جيناۋى قاجەت. ماتەماتيكا مەن وقۋ ساۋاتتىلىعىنان كەمىندە 3 بال جانە باسقا پاندەر بويىنشا كەمىندە 5 بال بولۋى ءتيىس. وسىدان كەيىن عانا، ءى ءى م جوعارى وقۋ ورنىنداعى كونكۋرسقا قاتىسا الادى. كونكۋرستىڭ اشىقتىعىن قامتاماسىز ەتۋ ماقساتىندا بىلتىردان بەرى تالاپكەرلەردى ىرىكتەۋدىڭ جاڭا فورماتى ەنگىزىلدى. ەندى تالاپكەرلەردىڭ اتا-اناسى مەن تۋىستارى الەۋمەتتىك جەلى ارقىلى قابىلداۋ ەمتيحاندارىن تىكەلەي ەفيردە باقىلاي الادى»، - دەيدى ول.

بريفينگىدە ايتىلعانداي، وليمپيادالار مەن عىلىمي جوبالاردىڭ، سول سياقتى سپورتتىق جارىستاردىڭ جەڭىمپازدارىنا باسىمدىق بەرىلەدى.

اتاپ ايتقاندا:

- «التىن بەلگى» يەگەرلەرى؛

- ۇ ب ت- دان كەمىندە 100 بال جيناعاندار؛

- ۇلتتىق ۇلاندا مەرزىمدى اسكەري قىزمەت وتكەرىپ، ۇ ب ت- دان كەمىندە 50 بال جيناعاندار. (ءار پاننەن كەمىندە 3 ۇپايدان جيناۋ قاجەت)؛

- قىزمەتتىك مىندەتتەرىن اتقارۋ كەزىندە قازا تاپقان نەمەسە مۇگەدەك بولعان قىزمەتكەرلەردىڭ بالالارى كونكۋرستان تىس قابىلدانادى.