ىشكى ىستەر مينيسترلىگى سادىقوۆتى اتتى دەگەن كۇدىككە ىلىنگەندەرگە قاتىستى تۇسىنىك بەردى
استانا. KAZINFORM – ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ كيەۆتە ايدوس سادىقوۆقا قاستاندىق جاسادى دەگەن كۇدىكپەن ۇستالعان ا. جاقانبايەۆقا قاتىستى تۇسىنىك بەردى.
بۇگىن ءماجىلىستىڭ جالپى وتىرىسىنان كەيىن تىلشىلەر ءى ءى م وكىلىنەن «كۇدىكتى جاقانبايەۆ تەرگەۋ ورگاندارىنا ءوزى بەرىلدى مە؟» دەپ سۇرادى.
ءوز كەزەگىندە م. قوجايەۆ كۇدىكتى قازاقستاننىڭ ىشكى ىستەر ورگاندارىنا ءوز بەتىنشە حابارلاسقانىن ايتتى.
«قازىر تەرگەۋ امالدارى ءجۇرىپ جاتىر. ارنايى پروكۋرورلار وسى ىسپەن اينالىسىپ وتىر. ىشكى ىستەر مينيسترلىگى قازىر جەدەل ىزدەستىرۋ قىزمەتىمەن اينالىسىپ جاتىر»، - دەدى ق ر ىشكى ىستەر ءمينيسترىنىڭ ءبىرىنشى ورىنباسارى.
سونىمەن قاتار ول ەكىنشى كۇدىكتى مەيرام قاراتايەۆتى ىزدەستىرۋ جۇمىستارى جالعاسىپ جاتقانىن ناقتىلادى.
بيىل 22-ماۋسىمدا قازاقستاننىڭ باس پروكۋراتۋراسى كيەۆتە ايدوس سادىقوۆتى اتىپ كەتتى دەپ ايىپتالعان كۇدىكتىلەردىڭ بىرەۋى (التاي جاقانبايەۆ) قامالعانىن حابارلادى.
ەسكە سالا كەتەيىك، 18-ماۋسىمدا كيەۆتە تۇراتىن جۋرناليست ايدوس سادىقوۆتى ءۇيىنىڭ جانىندا الدەبىرەۋلەر اتىپ كەتتى. ول قازىر اۋرۋحانادا جاتىر.
ۋكراينا پروكۋراتۋراسى ەكى كۇدىكتىنىڭ سول كۇنى-اق شەكارانى كەسىپ ءوتىپ، ەلدەن كەتىپ قالعانىن حابارلادى.
باس پروكۋراتۋرا ايدوس سادىقوۆتى ولتىرمەك بولعانداردى تابۋ ءۇشىن ءوز بەتىنشە تەرگەۋ باستاعان ەدى.- ماۋسىمدا ىشكى ىستەر مينيسترلىگى ايدوس سادىقوۆقا وق اتتى دەگەن كۇدىكتىنىڭ قازاقستان پوليتسياسىندا جۇمىس ىستەمەيتىنىن حابارلادى.
مەملەكەت باسشىسى قاستاندىقتى تەرگەۋ امالدارىن ءجىتى باقىلاپ وتىر.
