ىشكى ىستەر مينيسترلىگى جاياۋ جۇرگىنشىلەر تۋرالى ۇسىنىلعان تۇزەتۋدى الىپ تاستادى
استانا. KAZINFORM - ءى ءى م قوعامدىق تالقىلاۋ قورىتىندىسى بويىنشا جول ءجۇرىسى قاعيدالارىندا جاياۋ جۇرگىنشىلەر تۋرالى ۇسىنىلعان تۇزەتۋدى الىپ تاستادى. بۇل تۋرالى ىشكى ىستەر مينيسترلىگىنىڭ باسپا ءسوز قىزمەتى مالىمدەدى.
بۇقارالىق اقپارات قۇرالدارىندا بۇرىن «اشىق ن ق ا» پورتالىندا جاريالانعان جول ءجۇرىسى قاعيدالارىنىڭ 16-تارماعىنا ەنگىزىلگەن تۇزەتۋ جوباسى حالىق پەن ساراپتامالىق قوعامداستىق اراسىندا كەڭىنەن تالقىلاندى.
«ۇسىنىلعان تۇزەتۋگە سايكەس، رەتتەلەتىن قوزعالىس ورىندارىندا باعدارشامنىڭ نەمەسە رەتتەۋشىنىڭ رۇقسات بەرۋ سيگنالى قوسىلعان كەزدە جاياۋ جۇرگىنشىلەرگە جول قيىلىسى ارقىلى بۇرىن باستاعان قوزعالىستى اياقتاۋ ءۇشىن كولىك قۇرالدارىنا جول بەرۋ ۇسىنىلدى. قازىرگى ۋاقىتتا قوعامدىق پىكىردى جانە ساراپتامالىق قوعامداستىقتىڭ پىكىرىن ەسكەرە وتىرىپ، اتالعان تۇزەتۋ جوبادان الىنىپ تاستالدى»، - دەپ ايتىلدى ءى ءى م-دە.
بۇعان دەيىن جول قوزعالىسى قاعيدالارى، كولىك قۇرالدارىن پايدالانۋعا رۇقسات بەرۋ جونىندەگى نەگىزگى ەرەجەلەرگە وزگەرىس ەنگىزىلەتىنى ايتىلعان ەدى. جاڭا ەرەجەگە سايكەس، باعدارشامنىڭ جاسىل ءتۇسى جانعان كەزدە جاياۋ جۇرگىنشى جول قيىلىسىندا قوزعالىسىن باستاپ قويعان جۇرگىزۋشىگە مانەۆرىن اياقتاۋ ءۇشىن جول بەرۋى كەرەك بولاتىن.
