ىشكى ىستەر ءمينيسترى مەن گەننادي گولوۆكين ارىپتەستىك تۋرالى كەلىسىمگە قول قويدى
استانا. KAZINFORM - ىشكى ىستەر ءمينيسترى ەرجان سادەنوۆ مەن ۇ و ك پرەزيدەنتى گەننادي گولوۆكين پوليتسيا ۆەدومستۆوسىندا ارىپتەستىك تۋرالى كەلىسىمگە قول قويدى.
بۇل تۋرالى ق ر ۇلتتىق وليمپيادالىق كوميتەتتىڭ باسپا ءسوز قىزمەتى حابارلادى.
«بۇگىنگى كەزدەسۋ ءبىزدىڭ سپورتتى دامىتۋ جانە جوعارى ناتيجەگە قول جەتكىزۋ جولىنداعى بىرلەسكەن ءىس-قيمىلىمىزدى جالعاستىرادى دەپ سەنەمىن. تاۋەلسىزدىك العالى بەرى وليمپيادا ويىندارىندا جەڭىپ العان 71 مەدالدىڭ 66 سى «دينامو» قوعامداستىعىنان شىققان اتلەتتەرگە تيەسىلى ەكەنىن ايتا كەتكىم كەلەدى»، - دەدى ىشكى ىستەر ءمينيسترى ەرجان سادەنوۆ.
ۇلتتىق وليمپيادا كوميتەتى باسشىسى وتاندىق سپورتتى دامىتۋ بىرلەسكەن كۇشتى تالاپ ەتەتىن جاۋاپتى ءىس ەكەنىن العا تارتتى.
«ۇ و ك ءبىزدىڭ وليمپياداشىلاردى دايىنداۋ جولىندا قولداۋ كورسەتكەن ىشكى ىستەر مينيسترلىگى كومەگىن جوعارى باعالايدى. ءبىزدىڭ ارىپتەستىگىمىز قازاقستانداعى سپورتتى ودان ءارى دامىتۋعا جانە اتلەتتەرىمىزدى الەمدىك دەڭگەيدەگى جەڭىسكە جەتەلەيتىنىنە سەبەپ بولارىنا سەنەمىن. ءبىزدىڭ ماقساتىمىز ورتاق، ءبىر ەلدىڭ نامىسىن قورعايمىز، سوندىقتان، بىرگە جۇمىس ىستەيمىز»، - دەدى گولوۆكين.
اۆتور
كۇنسۇلتان وتارباي
