ياساۋي كەسەنەسى قارت ادام سياقتى تۇراقتى كۇتىمدى قاجەت ەتەدى - مينيسترلىك

кесене
Фото: Мақсат Шағырбаев/Kazinform

استانا. KAZINFORM - ياساۋي كەسەنەسى ماڭىنداعى جاسىل جەلەكتى سۋعارعاننان ونىڭ ىلعالى عيماراتقا جەتكەن. بۇل جايىندا مادەنيەت جانە اقپارات مينيسترلىگىنەن ءمالىم ەتتى.

«قوجا احمەت ياساۋي كەسەنەسى - قاسيەتتى ءارى قۇندى دۇنيە. ەجەلگى تەحنيكامەن، تەحنولوگيامەن سالىنعان. ماتەريالدارى كونەرگەن ەسكەرتكىش تۇراقتى باقىلاۋدى تالاپ ەتەدى جانە ونى ساقتاۋ، قورعاۋ - ءبىرىنشى كەزەكتەگى ماسەلە. سوڭعى جىلدارى كەسەنەنىڭ توڭىرەگىندە جۇرگىزىلگەن بەلسەندى قۇرىلىس، اباتتاندىرۋ جۇمىستارى وعان اسەرىن تيگىزبەي قويمادى. ماسەلەن، جاسىل جەلەكتىڭ كوبەيىپ، ونى سۋعارۋ جەر قاباتى ىلعالدانۋىنىڭ ارتۋىنا سەپ بولعان. ال ول ىلعال كەسەنەگە دە جەتكەن دەگەن عالىمداردىڭ نەگىزدەمەسى بار»، - دەپ اتاپ وتەدى مينيسترلىكتەن اگەنتتىكتىڭ رەسمي ساۋالىنا وراي.

ۆەدومستۆو مالىمەتىنشە، وسى جۇمىستىڭ سالدارىنان كەسەنەنىڭ قازاندىق بولمەسىندەگى الەمدە انالوگى جوق ستالاكتيتتەردىڭ جاعدايىنا باقىلاۋدى كۇشەيتۋگە تۋرا كەلىپ وتىر.

«كەسەنەنىڭ كونسترۋكتسيالىق، تەحنيكالىق جاعدايىن 24/7 رەجيمدە باقىلاپ وتىرۋ ءۇشىن اۆتوماتتاندىرىلعان مونيتورينگ ورتالىعى قۇرىلدى. كەسەنەنىڭ جاعدايىن زەردەلەپ، زەرتتەپ وتىرۋ ماقساتىندا ەلىمىزدىڭ ءارتۇرلى بەيىمدەگى بەلگىلى عىلىمي- زەرتتەۋ ينستيتۋتتارى تارتىلادى. سونىمەن قاتار قاجەتتىلىگىنە وراي شەتەلدىك مامانداردىڭ دا پىكىرلەرى تىڭدالىپ ءجۇر. وسى ورايدا ونىڭ جاعدايىنا قاتىستى بارلىق مالىمەتتەر ارنايى سەرۆەرگە كۇنى-ءتۇنى ءتۇسىپ وتىرادى. قوجا احمەت ياساۋي كەسەنەسى قارت ادام سياقتى تۇراقتى كۇتىمدى، ياعني عىلىمي- رەستاۆراتسيالىق جۇمىستى قاجەت ەتەدى جانە ول جۇمىس مەرزىمىندە قامتاماسىز ەتىلۋدە»، - دەدى مينيسترلىكتەن.

سوڭعى جاڭالىقتار