ديماش قۇدايبەرگەن انكارادا تۇركى الەمىنىڭ ونەر جۇلدىزدارىمەن ءبىر ساحنادا ونەر كورسەتتى

اۋقىمدى مۋزىكالىق كەشتە تۇركيا پرەزيدەنتتىك سيمفونيالىق وركەسترى مەن تۇركى الەمىنىڭ تاڭداۋلى كلاسسيكالىق ۆوكال ورىنداۋشىلارى باس قوستى. بۇل تۋرالى dimashnews جازدى.

قازاقستان مەن قىرعىزستاننىڭ حالىق ءارتىسى، تۇركسوي ۇيىمىنىڭ جوعارى ماراپاتى - «تۇركى الەمىنىڭ مادەنيەت ەلشىسى» وردەنىنىڭ يەگەرى ديماش قۇدايبەرگەن كونسەرتكە ارنايى شاقىرىلعان قۇرمەتتى قوناق رەتىندە قاتىستى.

ديريجەر دجەمي دجان دەليورماننىڭ جەتەكشىلىگىمەن تۇركيا پرەزيدەنتتىك سيمفونيالىق وركەسترى الەمدىك كلاسسيكالىق مۋزىكا مۇراسىنىڭ تانىمال تۋىندىلارىن ورىندادى. «Ankara Arena» ساحناسىندا نينو روتانىڭ «Parla più piano»، دجۋزەپپە ۆەرديدىڭ «تراۆياتا» وپەراسىنان «Brindisi»، لاتيف حاميديدىڭ «بۇلبۇل» شىعارمالارى جانە باسقا دا ايگىلى مۋزىكالىق تۋىندىلار شىرقالدى.

كونسەرتتە سوپرانو زارينا التىنبايەۆا مەن سالتانات داۋلەتحانوۆا (قازاقستان)، تەنور مۇرات كاراحان مەن سوپرانو بەريل يورەكلي ەل (تۇركيا)، تەنور اتادجان بەرديەۆ (تۇرىكمەنستان)، سوپرانو زايرا رايمبەكوۆا (قىرعىزستان)، تەنور ۋميد شاۆكات ۋگلي (وزبەكستان) جانە تەنور راميل گاسىموۆ (ازەربايجان) ونەر كورسەتتى.

ديماش قۇدايبەرگەن تۇركيا پرەزيدەنتتىك سيمفونيالىق وركەسترىنىڭ سۇيەمەلدەۋىمەن ءوزىنىڭ «ۇمىتىلماس كۇن» اتتى اۆتورلىق كومپوزيتسياسىن قازاق تىلىندە ورىنداپ، الەمدىك روك مۋزىكاسىنىڭ كلاسسيكاسى سانالاتىن Queen توبىنىڭ «The Show Must Go On» تۋىندىسىن كوپشىلىك نازارىنا ۇسىندى.

سونىمەن قاتار قازاقستاندىق ءانشى تانىمال تۇرىك ديدجەيى بۋراك يەتەرمەن بىرلەسىپ جازعان «Weekend» كومپوزيتسياسىن جانە جۋىردا تۇساۋى كەسىلگەن، تۇرىك تىلىندەگى العاشقى اۆتورلىق ءانى «Yazgi» تۋىندىسىن ورىندادى.

ديماشتىڭ ساحناداعى ونەرىن كەشكە جينالعان كورەرمەندەر ىستىق ىقىلاسپەن قارسى الىپ، ۇزدىكسىز قولداۋ كورسەتتى. ءانشى كورەرمەندەرمەن قازاق، اعىلشىن جانە تۇرىك تىلدەرىندە امانداسىپ، العىسىن بىلدىرە وتىرىپ، باۋىرلاس تۇرىك حالقىنىڭ الدىندا ونەر كورسەتۋدى زور قۋانىش ءارى مارتەبە سانايتىنىن اتاپ ءوتتى.

ايتا كەتەيىك، بۇعان دەيىن ديماشتىڭ كونسەرتتەرى قارساڭىندا مەحيكودا ارنايى اۆتوبۋس قاتىناي باستاعانىن جازدىق.