يادرولىق قارۋعا ءبىر قادام: يراننىڭ ۋران بايىتۋى جاڭا دەڭگەيگە شىقتى
استانا. KAZINFORM - تەگەران ۋران قورىن قارۋ جاساۋعا جاقىن دەڭگەيدە بايىتىپ، ونى كوبەيتۋدى جالعاستىرۋدا. بۇل تۋرالى حالىقارالىق اتوم ەنەرگياسى اگەنتتىگىنىڭ (ماگاتە) قۇپيا ەسەبىندە ايتىلعان، دەپ جازدى Kazinform مەنشىكتى ءتىلشىسى Associated Press اگەنتتىگىنە سىلتەمە جاساپ.
فوتو: اتوم ەنەرگياسى جونىندەگى حالىقارالىق اگەنتتىك (ماگاتە)
ەسەپكە سايكەس، 17-مامىرداعى جاعداي بويىنشا يراندا %60 عا دەيىن بايىتىلعان 408,6 كيلوگرامم ۋران بار. بۇل اقپان ايىمەن سالىستىرعاندا 133,8 كيلوگرامعا ارتىق، ياعني شامامەن 50 پايىزعا وسكەن. %60 دىق بايىتۋ دەڭگەيى يادرولىق قارۋعا قاجەتتى %90 عا دەيىنگى ءبىر عانا تەحنيكالىق قادام بولىپ سانالادى.
سونداي- اق، ەسەپتە %60 عا دەيىن بايىتىلعان شامامەن 42 كيلوگرامم ۋراندى %90 عا دەيىن جەتكىزۋ - ءبىر يادرولىق زارياد جاساۋعا تەوريالىق تۇرعىدا جەتكىلىكتى ەكەنى ايتىلعان.
ماگاتە مالىمدەۋىنشە، يران - رەسمي تۇردە يادرولىق قارۋى جوق، ءبىراق وسىنداي جوعارى دەڭگەيدە ۋران بايىتىپ جاتقان جالعىز مەملەكەت.
جالپى، يرانداعى بارلىق دەڭگەيدە بايىتىلعان ۋران كولەمى 9247,6 كيلوگرامدى قۇرايدى — بۇل اقپان ايىنداعى سوڭعى توقساندىق ەسەپپەن سالىستىرعاندا 953,2 كيلوگرامعا ارتىق. يران ءوز يادرولىق باعدارلاماسىنىڭ بەيبىت ماقساتتا ەكەنىن العا تارتۋىن جالعاستىرۋدا. الايدا، ماگاتە باسشىسى رافاەل ماريانو گروسسي بۇعان دەيىن ەگەر يران ءتيىستى شەشىم قابىلدايتىن بولسا، قولىنداعى بايىتىلعان ۋران قورى بىرنەشە يادرولىق وقتۇمسىق جاساۋعا جەتكىلىكتى ەكەنىن ەسكەرتكەن.
جاڭا ەسەپ ماگاتە تاراپىنان تەگەران مەن ۆاشينگتون اراسىنداعى كۇردەلى كەلىسسوزدەر ءجۇرىپ جاتقان ۋاقىتتا جاريالانىپ وتىر. ا ق ش پرەزيدەنتى دونالد ترامپتىڭ اكىمشىلىگى يراننىڭ يادرولىق باعدارلاماسىنا شەكتەۋ قوياتىن جاڭا كەلىسىمگە قول جەتكىزۋگە ۇمتىلۋدا، ءبىراق ازىرگە تاراپتار ايتارلىقتاي پروگرەسكە جەتكەن جوق.
باسىلىمنىڭ حابارلاۋىنشا، يران تاراپى بۇل ەسەپكە ءالى رەسمي پىكىر بىلدىرگەن جوق.
بۇعان دەيىن تەگەران، ەگەر ۆاشينگتونمەن كەلىسسوزدەر ءساتتى اياقتالسا، حالىقارالىق اتوم ەنەرگياسى اگەنتتىگى (ماگاتە) قۇرامىنداعى امەريكالىق ينسپەكتورلارعا ءوز يادرولىق نىساندارىنا بارۋعا رۇقسات بەرۋى مۇمكىن ەكەنى حابارلانعان بولاتىن.
تەگەران ترامپپەن يادرولىق كەلىسىمدە ۋراننان باس تارتۋعا دايىن.
