يۆان ساۋەر: مۇنداي جەتىستىككە جەتەمىز دەپ ويلاماعان ەدىك

استانا. KAZINFORM - قازاقستاننىڭ اگروونەركاسىپ كەشەنى سوڭعى جىلدارى قارقىندى دامىپ، جاڭا بەلەسكە كوتەرىلدى. قازىر سالاعا جاستاردىڭ قىزىعۋشىلىعى ارتىپ، اۋىل شارۋاشىلىعىندا ەڭبەك اۋلەتتەرى قالىپتاسىپ كەلەدى. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲ فورۋمى اياسىندا «رودينا» اگروفيرماسىنىڭ باس ديرەكتورى يۆان ساۋەر ايتتى.

Иван Сауэр
Фото: Солтан Жексенбеков / Kazinform

ونىڭ پىكىرىنشە، مەملەكەت باسشىسىنىڭ قاتىسۋىمەن اگرارلىق فورۋمنىڭ تۇراقتى وتكىزىلۋى - مەملەكەتتىڭ اۋىل شارۋاشىلىعىنا دەگەن كوزقاراسى مەن سالانىڭ ەل ەكونوميكاسىنداعى ورنىن ايقىندايتىن ماڭىزدى كورسەتكىش.

- ءبىز بيىك مىنبەرلەردەن اگرارلىق سەكتوردى قولداۋ، اگروونەركاسىپ كەشەنىن دامىتۋ تۋرالى ءجيى ەستيمىز. الايدا مەملەكەت باسشىسىنىڭ قاتىسۋىمەن وسىنداي اۋقىمدى فورۋمنىڭ تۇراقتى وتكىزىلۋى - ءسوز جۇزىندەگى مالىمدەمە ەمەس، ناقتى ءىستىڭ كورىنىسى. بۇل مەملەكەتتىڭ اگرارلىق سالاعا دەگەن كوزقاراسىن جانە ونىڭ ەل ەكونوميكاسىنداعى ورنىن كورسەتەدى، - دەدى ول.

كاسىپكەردىڭ ايتۋىنشا، نارىقتاعى كۇردەلى جاعدايعا جانە نەگىزگى ونىمدەر باعاسىنىڭ قولايسىزدىعىنا قاراماستان، اگروونەركاسىپ كەشەنى قارقىندى دامىپ كەلەدى. سونىمەن قاتار ول اۋىل شارۋاشىلىعىنا ەڭبەك ەتۋگە نيەتتى ازاماتتار ءۇشىن قازىر مول مۇمكىندىك جاسالعانىن اتاپ ءوتتى.

- بۇگىندە اۋىل شارۋاشىلىعى سالاسىنا كەلىپ، ەڭبەك ەتۋگە دايىن ادام جاي عانا جۇمىس ىستەمەيدى، ول ءوز ىسىنەن ءلاززات الادى. بىرنەشە جىل بۇرىن قازىرگى جاسالىپ جاتقان جاعدايلاردى ارمانداۋدىڭ ءوزى قيىن ەدى. ارينە، بىرەۋلەر بۇل سالاعا كەلە سالا بايىپ، مىڭداعان گەكتار القاپتى يگەرىپ، كوپ مال وسىرگىسى كەلەدى. ءبىراق عاجايىپ بولمايدى. قازىر سالانى دامىتۋعا، جەتىلدىرۋگە بەرىلىپ وتىرعان مۇمكىندىكتەر وراسان زور، - دەدى يۆان ساۋەر.

سونداي-اق ول اۋىل شارۋاشىلىعىنىڭ دامۋ قارقىنىنا توقتالىپ، بۇگىنگى جەتىستىكتەردى ون جىل بۇرىنعى كەزەڭمەن سالىستىردى.

- بۇگىندە ءبىز ءبىر جىلدىڭ ىشىندە وسىدان ون جىل بۇرىن بەس جىلدا اتقارعان جۇمىسىمىزدى جۇزەگە اسىرىپ وتىرمىز. بۇل - وتە جىلدام سەرپىلىس، قارقىندى دامۋ. كەشەگى كۇنىمىزگە كوز جۇگىرتسەك، مۇنداي جەتىستىككە جەتەمىز دەپ ويلاماعان ەدىك، - دەدى كاسىپكەر.

بۇدان بولەك، يۆان ساۋەر جاستاردىڭ اگروونەركاسىپ كەشەنىنە بەت بۇرا باستاعانىن ەرەكشە اتاپ ءوتتى.

- قازىر زالعا كوز سالساڭىز، جاستاردىڭ اگروونەركاسىپ كەشەنىنە قانشالىقتى بەلسەندى كەلىپ جاتقانىن بايقايسىز. ەڭ قىزىعى، سالادا ەڭبەك اۋلەتتەرى كوبەيىپ كەلەدى. بۇرىن ارىپتەستەرىمنىڭ بالالارى زاڭگەر، ەكونوميست بولىپ، ءتۇرلى مەملەكەتتىك ورگاندارعا جۇمىسقا كەتەتىن. ال بۇگىندە سولار قىزمەتتەرىن تاستاپ، كەيبىرى پوگوندارىن شەشىپ، اۋىل شارۋاشىلىعىنا كەلىپ جاتىر. بۇل - اگروونەركاسىپ كەشەنىنىڭ بولاشاعى زور ەكەنىن كورسەتەتىن ناقتى بەلگى. ەڭبەك اۋلەتتەرىنىڭ قالىپتاسۋى - وسى سالانى تاڭداۋدىڭ، وعان دەگەن سەنىمنىڭ ايقىن كورىنىسى، - دەپ تۇيىندەدى يۆان ساۋەر.