ەندى نەسيە العاننان كەيىن ودان قايتا باس تارتۋعا بولادى
استانا. KAZINFORM - قازاقستاندا 12-قازاننان باستاپ ازاماتتار نەسيە العاننان كەيىن 14 كۇن ىشىندە ودان باس تارتا الادى. مۇنداي جاعدايدا بانك ايىپپۇل سالمايدى، دەپ حابارلايدى MadeniPortal.kz.
جاڭا ەرەجەنى قارجى نارىعىن رەتتەۋ جانە دامىتۋ اگەنتتىگى ەنگىزدى. ءبىراق بۇل مۇمكىندىك تەك كەپىلسىز نەسيەگە قاتىستى. ياعني، نەسيە الۋ ءۇشىن ءۇيىن، كولىگىن نەمەسە باسقا مۇلكىن كەپىلگە قويماعان ادامدار عانا بۇل ەرەجەنى پايدالانا الادى. ەگەر ادام نەسيەدەن باس تارتسا، بانك وعان ايىپپۇل سالا المايدى. دەگەنمەن اقشانى پايدالانعان كۇندەرى ءۇشىن پايىز تولەۋگە تۋرا كەلەدى.
ەگەر ادام نەسيە العان كەزدە قوسىمشا ساقتاندىرۋ راسىمدەسە، ودان دا باس تارتا الادى. مۇنداي جاعدايدا ساقتاندىرۋدىڭ پايدالانىلماعان ۋاقىتىنا تيەسىلى اقشا قايتارىلادى. ءبىراق بانك نەمەسە ميكروقارجى ۇيىمى قىزمەت كورسەتۋگە كەتكەن ناقتى شىعىنىن ۇستاپ قالۋى مۇمكىن.
نەسيە بەرمەس بۇرىن بانك كليەنتكە 14 كۇن ىشىندە ودان باس تارتۋعا بولاتىنىن ايتۋى كەرەك. سونداي-اق نەسيە بويىنشا قانشا اقشا قايتاراتىنىن، قانداي شارتتار بارىن جانە قانداي تاۋەكەلدەر بولۋى مۇمكىن ەكەنىن جاسىرماۋعا ءتيىس.
بۇدان بولەك، بانك كليەنتكە نەسيە الۋدى نەمەسە قوسىمشا اقىلى قىزمەتتەردى كۇشتەپ ۇسىنا المايدى. جاڭا ەرەجەنىڭ ماقساتى - ازاماتتارعا نەسيە الۋ تۋرالى شەشىمىن قايتا ويلانۋعا ۋاقىت بەرۋ جانە بانكتەردىڭ شارتتارىن تۇسىنىكتى ەتۋ.
