دىنگە قاتىستى داۋ: ەيفەل مۇناراسىنىڭ باسشىسى قىزمەتىنەن كەتەدى

بۇعان يندۋيستىك ءدىني توبىنىڭ وكىلدەرى كەلگەن كەزدە ايەل قىزمەتكەرلەردى جۇمىس ورىندارىنان كەتۋگە ماجبۇرلەۋگە قاتىستى داۋ سەبەپ بولدى، دەپ حابارلايدىBBC .

SETE رۋۆيونىڭ كومپانيانى 2018-جىلدان بەرى باسقارىپ كەلگەنىن جانە جىل سوڭىندا قىزمەتىنەن كەتەتىنىن حابارلادى. ىشكى تەكسەرۋ بارىسىندا كەلۋشىلەرگە قىزمەت كورسەتۋ كەزىندە ايەلدەردى جۇمىس ورىندارىنان شەتتەتۋگە جول بەرىلگەنى انىقتالعان. كومپانيا مۇنداي ارەكەتتى «جول بەرىلمەيتىن جاعداي» دەپ باعالادى.

وقيعا قىركۇيەكتىڭ باسىندا شامامەن 100 ادامنان تۇراتىن يندۋيستىك BAPS ءدىني قوزعالىسىنىڭ دەلەگاتسياسى ەيفەل مۇناراسىنا بارعان كەزدە بولعان. BAPS وكىلدەرى ساپار كەزىندە ايەلدەرمەن بايلانىستى بارىنشا ازايتۋدى سۇراعان.

وسىدان كەيىن مۇنارا قىزمەتكەرلەرى نارازىلىق رەتىندە ەرەۋىلگە شىعىپ، نىسان ۋاقىتشا جابىلدى. كاسىپوداق وكىلدەرى ايەل قىزمەتكەرلەردىڭ ءوزىن قورلانعانداي سەزىنگەنىن ايتتى.

فرانسيا ۇلتتىق جينالىسىنىڭ ءتورايىمى ياەل براۋن-پيۆە ايەلدەردى شەتەلدىك قوناقتاردىڭ تالابىن ورىنداۋ ءۇشىن جۇمىس ورىندارىنان كەتىرۋگە بولمايتىنىن مالىمدەدى. پاريج مەرى ەممانيۋەل گرەگۋار بۇل شەشىمدى «ابسۋرد، ادىلەتسىز جانە جول بەرىلمەيتىن» دەپ اتاپ، ەكى بولەك تەكسەرۋ جۇرگىزۋدى تاپسىردى.

SETE باسقارما ءتوراعاسى اريەل ۆەيل كومپانيادا گەندەرلىك تەڭدىك بويىنشا قوسىمشا وقىتۋ باعدارلامالارى ەنگىزىلەتىنىن ايتتى.

BAPS ۇيىمى بولعان جاعدايعا بايلانىستى كەشىرىم سۇراپ، «ءوزارا قۇرمەت پەن قوعامعا قىزمەت ەتۋ سياقتى امبەباپ قۇندىلىقتاردى» ۇستاناتىنىن مالىمدەدى.

BAPS ەرلەر مەن ايەلدەردىڭ بولەك بولۋى ايەلدەردىڭ يگىلىگى ءۇشىن قاجەت دەپ سانايدى. الايدا سىنشىلار قازىرگى قوعامدا ءدىني داستۇرگە بايلانىستى ايەلدەردى بەلگىلى ءبىر ورىنداردان شەتتەتۋ كەمسىتۋشىلىككە اكەلەتىنىن العا تارتادى.