ەندى eGov ارقىلى الەۋمەتتىك تولەمدەردەن ءوز ەركىمەن باس تارتۋعا بولادى

سەرۆيس تەك الەۋمەتتىك تولەمدەر مەن جاردەماقىلاردى الىپ جۇرگەن ازاماتتارعا قولجەتىمدى. ال مۇنداي تولەمدەردى المايتىن ازاماتتار سەرۆيستى پايدالانا المايدى.

- الەۋمەتتىك تولەمدەر مەن جاردەماقىلاردان ەرىكتى تۇردە باس تارتۋ - ازاماتتىڭ مىندەتى ەمەس، تەك ءوز ەركىمەن قابىلدايتىن شەشىمى. سەرۆيس ەشقانداي تالاپ قويمايدى جانە ازاماتتارعا قاتىستى شەكتەۋلەر ەنگىزبەيدى. بۇل مۇمكىندىك ازاماتتارعا وزدەرىنىڭ تۇرمىستىق جاعدايى مەن جەكە جاۋاپكەرشىلىگىن ەسكەرە وتىرىپ، سانالى تاڭداۋ جاساۋعا جول اشادى. سەرۆيس، ەڭ الدىمەن، مەملەكەتتىك قولداۋعا مۇقتاج ەمەس، ءوز قاجەتتىلىكتەرىن ءوز بەتىنشە قامتاماسىز ەتۋگە مۇمكىندىگى بار تابىسى جوعارى جانە ءال-اۋقاتى جوعارى ازاماتتارعا ارنالعان، - دەپ ءتۇسىندىردى ۆەدومستۆو.

بارلىق ءراسىم سيفرلىق فورماتتا جۇزەگە اسىرىلادى. سوندىقتان مەملەكەتتىك ورگاندارعا بارىپ، قاعاز جۇزىندە ءوتىنىش تولتىرۋدىڭ قاجەتى جوق.

- سەرۆيسكە كىرگەن كەزدە eGov Mobile قوسىمشاسى قاجەتتى مالىمەتتەردى اۆتوماتتى تۇردە تەكسەرىپ، ازاماتقا تاعايىندالعان جانە تولەنىپ جاتقان بارلىق جاردەماقىلار مەن الەۋمەتتىك تولەمدەردىڭ ءتىزىمىن ۇسىنادى. قانداي دا ءبىر اقپاراتتى قولمەن ەنگىزۋدىڭ قاجەتى جوق. ەگەر ازامات قانداي دا ءبىر تولەمنەن باس تارتۋ تۋرالى شەشىم قابىلداسا، ۇسىنىلعان تىزىمنەن ءتيىستى تولەمدى تاڭداپ، ارەكەتىن راستاۋى جانە ەلەكتروندىق ءوتىنىشتى جىبەرۋى جەتكىلىكتى. ال ەگەر ازامات بيۋجەت قاراجاتى ەسەبىنەن تولەنەتىن الەۋمەتتىك تولەمدەر مەن جاردەماقىلاردى الماسا، جۇيە بۇل تۋرالى حابارلاما كورسەتىپ، سەرۆيستى پايدالانۋعا مۇمكىندىك بەرمەيدى، - دەپ اتاپ ءوتتى ماماندار.

ەڭبەك مينيسترلىگىنىڭ مالىمەتىنشە، الەۋمەتتىك تولەمنەن نەمەسە جاردەماقىدان ەرىكتى تۇردە باس تارتۋ ازاماتتىڭ بولاشاقتا مەملەكەتتىك قولداۋ الۋ ءۇشىن قايتا ءوتىنىش بەرۋ قۇقىعىن شەكتەمەيدى. ومىرلىك جاعدايى وزگەرگەن جاعدايدا ازامات ءتيىستى تولەمدى قايتا تاعايىنداۋ جونىندە ءوتىنىش بەرە الادى. ءوتىنىش قولدانىستاعى زاڭنامادا بەلگىلەنگەن تارتىپپەن جانە تولەم تاعايىنداۋ تالاپتارىنا سايكەس قارالادى.

سەرۆيستى ازىرلەۋشىلەر ونى ازاماتتار ءۇشىن بارىنشا ىڭعايلى ەتۋگە باسىمدىق بەرەدى. وسى ماقساتتا قوسىمشانىڭ وزىندە كەرى بايلانىس قالدىرۋ مۇمكىندىگى قاراستىرىلعان. پايدالانۋشىلار ءوز پىكىرلەرىن ءبىلدىرىپ، سۇراقتارىن جولداپ، ۇسىنىستارىن جىبەرە الادى. سونداي-اق سەرۆيس جۇمىسىنا قاتىستى ەسكەرتۋلەرىن دە قالدىرۋعا بولادى.

- ازاماتتاردى ساق بولۋعا جانە تەك ەڭبەك مينيسترلىگىنىڭ رەسمي اقپارات كوزدەرىنە سەنۋگە شاقىرامىز. اتالعان سەرۆيس تەك eGov Mobile رەسمي موبيلدى قوسىمشاسىندا نەمەسە eGov.kz پورتالىندا جۇمىس ىستەيدى. ەڭبەك مينيسترلىگى مەسسەندجەرلەر ارقىلى الەۋمەتتىك تولەمدەردەن باس تارتۋعا ارنالعان كۇماندى سىلتەمەلەر جىبەرمەيدى. الاياقتاردىڭ ارباۋىنا ءتۇسىپ قالماۋ ءۇشىن بوگدە سىلتەمەلەرگە وتپەڭىزدەر. كەز كەلگەن قىزمەتتىڭ قولجەتىمدىلىگىن تەك eGov جۇيەسىندەگى جەكە كابينەت ارقىلى تەكسەرىڭىزدەر، - دەپ ەسكەرتتى جاۋاپتى مەكەمە.

وسىعان دەيىن eGov Mobile قوسىمشاسىنداعى ءال-اۋقاتتى باعالاۋ كالكۋلياتورى قالاي جۇمىس ىستەيتىنىن جازعانبىز.