XXI عاسىردا اتاۋى وزگەرگەن قازاقستان قالالارى

نۇر-سۇلتان. قازاقپارات - جەر-سۋ اتاۋىنىڭ وزگەرۋىنە سەبەپ كوپ.
حالىقتىڭ قاجەتتىلىگىنەن، ساياسي جاعدايلارعا بايلانىستى، كەيدە ەلدىڭ ەكونوميكالىق شىعىندارىن ازايتۋ ماقساتىندا وزگەرتىپ جاتادى. شاعىن ەلدى مەكەننىڭ اتىن وزگەرتۋ وڭاي. ال ءىرى ەلدى مەكەن - قالانىڭ، ودان قالسا، وبلىس سياقتى ءىرى تەرريتوريالدى ايماقتىڭ اتىن وزگەرتۋ قيىن.
ەندەشە XXI عاسىردا سونداي قيىندىقتارعا قاراماي اتاۋى وزگەرگەن قازاقستان قالالارى جايلى ءسوز ەتسەك.
نۇر-سۇلتان قالاسى
ەلوردامىز استانا قالاسىنىڭ اتاۋى 2019-جىلى 20- ناۋرىزدا وزگەرىپ، ورنىنا «نۇر-سۇلتان» دەگەن اتاۋ بەرىلدى. قازاقستاننىڭ جاڭادان سايلانعان پرەزيدەنتى قاسىم-جومارت توقايەۆ ەكس-پرەزيدەنت نۇرسۇلتان نازاربايەۆتىڭ ەڭبەگىن ەلەۋ ماقساتىندا ەلوردانىڭ اتىنا ەلباسىنىڭ اتىن بەرۋدى ۇسىنادى.
جالپى بۇل قالانىڭ تاريحى ءبىرشاما قىزىق. اتى ءبىر ەمەس، بىرنەشە رەت اۋىسقان. ءاۋ باستا اقمولينسك، كەيىن سەلينوگراد، ودان كەيىن اقمولا قالاسى بولدى. ەل تاۋەلسىزدىگىن الىپ، استانا كوشىرۋ جايلى وي ايتىلىپ، ەكس-پرەزيدەنت ن. نازاربايەۆتىڭ باستاماسىمەن 1997-جىلى اقمولا قالاسى - ەلدىڭ استاناسى بوپ جاريالانادى. ءبىر جىلدان كەيىن 1998-جىلى 6- مامىردا قالانىڭ اتى وزگەرىپ، «استانا» دەگەن اتاۋ قويىلدى.
سودان كەيىن 21 جىلدان سوڭ، XXI عاسىردا استانانىڭ اتى تاعى اۋىستى. ەندىگى اتى - نۇر-سۇلتان قالاسى.
قونايەۆ قالاسى
2022-جىلى 3- مامىردا قاپشاعاي قالاسى رەسمي تۇردە قونايەۆ قالاسى دەپ وزگەرتىلدى.
بۇل قالا - 1970-جىلى قاپشاعاي سۋ قويماسىنىڭ ماڭىندا قۇرىلعان قالا. قازىرگى تاڭدا 2 وكرۋگ جانە 11 ەلدى مەكەننەن تۇرادى. الماتى قالاسىنان سولتۇستىككە قاراي 56 شاقىرىم جەردە ورنالاسقان.
قازاق تىلىندە «قاپشاعاي» اتاۋى «تار شاتقال» نەمەسە «قىسىلعان جەر» دەگەندى بىلدىرەدى.
2022-جىلدىڭ 16- ناۋرىزىندا پرەزيدەنت قاسىم-جومارت توقايەۆ قاپشاعايدىڭ اتىن حالىق قالاسا، قونايەۆ دەپ وزگەرتۋدى قولدايتىنىن مالىمدەدى. سونداي-اق، ول الماتى وبلىسىنىڭ جاڭا ورتالىعى بولۋىن، ودان ورتالىعى تالدىقورعان قالاسىندا ورنالاسقان جاڭا جەتىسۋ ءوڭىرىنىڭ ءبولىنىپ شىعۋىن ۇسىندى.
قالادا اسكەري ءبولىم، بىرنەشە زاۋىت پەن ويىنحانالار بار. حالىق سانى شامامەن 60 مىڭنان اسادى.
سەمەي قالاسى
بۇرىنعى سەميپالاتينسك قالاسى 2007-جىلى ەكس-پرەزيدەنت نۇرسۇلتان نازاربايەۆتىڭ ۇسىنىسى بويىنشا سەمەي بولىپ وزگەردى. قالانىڭ تاريحتاعى قازاقشا اتى - جەتىشاتىر. سونىڭ ورىسشا اۋدارىلعان «سەميپالات» نۇسقاسى كەڭەس وداعى تۇسىندا قالا اتىنا اينالىپ كەتتى.
بۇل قالا - قازاقستاننىڭ مادەني استاناسى سانالادى. الاشوردا قايراتكەرلەرىنىڭ باس قوسقان قالاسى.
قازىرگى ۋاقىتتا 2022-جىلدان باستاپ پرەزيدەنت قاسىم-جومارت توقايەۆتىڭ ۇسىنىسىمەن اباي وبلىسىنىڭ ورتالىعى بوپ جاريالاندى. حالىق سانى شامامەن 350 مىڭعا جۋىق.
massaget.kz