«XXI عاسىر كوشباسشىسى»: تالاي جۇيرىكتىڭ تۇساۋىن كەسكەن تەلەجوبا ەكرانعا قايتا ورالادى
استانا. KAZINFORM - كوپشىلىك كورەرمەنگە تانىمال وقۋشىلار اراسىنداعى «XXI عاسىر كوشباسشىسى» ينتەللەكتۋالدىق ويىنى تەلەەكرانعا جاڭا فورماتتا قايتا شىعادى.

«حابار» اگەنتتىگى مەن ق ر وقۋ-اعارتۋ مينيسترلىگىنىڭ «دارىن» ر ع پ و بىرلەسىپ، مەگاجوبانى قايتا جاڭعىرتۋعا كىرىستى. جوبا كوكتەمنەن باستاپ «حابار» تەلەارناسىنىڭ ەفيرىنەن كورسەتىلە باستايدى.
وقۋ-اعارتۋ مينيسترلىگىنىڭ مالىمەتىنشە، اتالمىش جوبا - ەلىمىزدىڭ بولاشاق كوشباسشىلارىن تاربيەلەۋگە باعىتتالعان جاستار قوزعالىسى. قازىردىڭ وزىندە جۇزدەگەن دارىندى وقۋشى شاقىرۋدى قابىلداپ، قىزىقتى ينتەللەكتۋالدىق ويىننىڭ قاتىسۋشىلارىنا اينالدى. ءار وبلىستاعى ىرىكتەۋ كەزەڭدەرى 2024-جىلدىڭ قازان ايىندا باستالىپ، 2025-جىلدىڭ اقپان ايىنا دەيىن جالعاسادى.
وڭىرلەردەن ىرىكتەلگەن ەڭ ۇزدىك بەس وقۋشى رەسپۋبليكالىق كەزەڭگە قاتىسۋعا مۇمكىندىك الادى، ول وسى جىلدىڭ ناۋرىزىنان باستاپ ماۋسىم ايىنا دەيىن وتەدى.
جاس دارىنداردىڭ ءبىلىمى مەن قابىلەتىن جالپى بۇقاراعا كورسەتۋگە مۇمكىندىك بەرەتىن تەلەۆيزيالىق جوبا «حابار» اگەنتتىگىنىڭ 30 جىلدىعىنا وراي وتكىزىلىپ وتىر. ەڭ ۇزدىك ءۇش جەڭىمپازعا ەلىمىزدىڭ جوعارى وقۋ ورىندارىندا وقۋعا گرانتتار تابىستالادى.
قازىردىڭ وزىندە پاۆلودار، قاراعاندى، اباي، اقمولا، تۇركىستان، جامبىل، باتىس قازاقستان، شىعىس قازاقستان، ۇلىتاۋ، قىزىلوردا، اتىراۋ جانە ماڭعىستاۋ وبلىستارىنان، سونداي-اق استانا جانە شىمكەنت قالالارىنان رەسپۋبليكالىق تۋرعا قاتىساتىن ۇزدىك بەستىكتەر انىقتالدى. الماتى، اقتوبە، جەتىسۋ، سولتۇستىك قازاقستان، قوستاناي وبلىستارىندا جانە الماتى قالاسىندا ىرىكتەۋ كەزەڭدەرى قاڭتار-اقپان ايلارىندا وتەدى.
«XXI عاسىر كوشباسشىسى» - جاس دارىندارعا جاڭا مۇمكىندىكتەر بەرەتىن بىرەگەي الاڭ. ينتەللەكتۋالدىق ويىن ءبىلىمدى ءارى تالانتتى جاستاردى قوعامعا تانىستىرىپ قانا قويماي، شالعاي ەلدى مەكەندەردەن شىققان دارىندى جاس وسپىرىمدەر ءۇشىن ۇلكەن الەۋمەتتىك ليفت بولاتىنىنا سەنىم بار.
تەلەجوبا العاش رەت 25 جىل بۇرىن ۇسىنىلعان. وسى ۋاقىت ىشىندە ول وتاندىق تەلەۆيزياداعى ۇزدىك جوبالاردىڭ ءبىرى رەتىندە تانىلدى. بۇگىندە وسى جوباعا قاتىسقان كوپتەگەن جاستار ءوز جولدارىن تاۋىپ، ونەر مەن مادەنيەتتەن باستاپ قوعامدىق قىزمەت پەن بيزنەسكە دەيىن ءتۇرلى سالادا كاسىبي ماماندار رەتىندە تانىلدى.
استانالىق وقۋشىلار ەستە ساقتاۋ قابىلەتى بار اقىلدى روزەتكا جاساپ شىعارعانىن جازعان بولاتىنبىز.