وزىڭىزگە ۋادە بەرىڭىز: ءومىرىڭىزدى وزگەرتۋگە كومەكتەسەتىن 7 نارسە
جاڭا جىل - وزىڭىزگە بىرنەشە ماڭىزدى نارسەنى ۋادە ەتۋگە جاقسى ۋاقىت. بۇل قاراپايىم نارسەلەر بولسا دا، ءومىرىڭىزدى جاقسى جاعىنا وزگەرتۋگە كومەكتەسەدى.
«ءار ساتتەن ءلاززات الۋعا ۋادە بەرەمىن»
جۇمىس پەن ءۇيدىڭ اراسىندا جۇگىرىپ ءجۇرىپ، دەمالۋ جايلى ۇمىتىپ كەتۋ وڭاي. ەموتسيونالدى تۇرعىدا شارشاپ قالماس ءۇشىن اراسىندا باياۋلاپ، ساتتەردەن ءلاززات الۋدى ۇيرەنۋ ماڭىزدى. بۇل ءسىز ويلاعانداي قيىن ەمەس. ول ءۇشىن زەيىنىڭىزدى قازىر بولىپ جاتقان نارسەگە قويۋىڭىز كەرەك. سول كەزدەگى سەزىمدەرىڭىز بەن جاعىمدى ەموتسيالارىڭىزعا نازار اۋدارىڭىز دا، جاعىمسىز ويلاردى ىسىرىپ قويىڭىز.
«ءوزىمدى ەركەلەتىپ تۇرۋعا ۋادە بەرەمىن»
جاڭا جىلدا وزىڭىزگە تىم قاتال بولماۋعا جانە اراسىندا ءوزىڭىزدى ەركەلەتىپ تۇرۋعا ۋادە بەرىڭىز. مىسالى، وزىڭىزگە ارناپ ءدامدى تاماق پىسىرەسىز نەمەسە تاپسىرىس بەرەسىز، كوپتەن بەرى ارمانداپ جۇرگەن زاتىڭىزدى ساتىپ الاسىز، بىرنەشە كۇن ەشتەڭە ىستەمەي جاتاسىز. سۇيىكتى حوببي، دوستارمەن كەزدەسۋ سەكىلدى جاعىمدى نارسەلەرگە كەستەڭىزدەن ۋاقىت تابۋعا تىرىسىڭىز، بۇل ءوزىڭىزدى باقىتتىراق سەزىنۋگە كومەكتەسەدى.
«ءوزىمدى قابىلداپ ۇيرەنۋگە ۋادە بەرەمىن»
ءوزىڭىزدى قالاي بار، سولاي قابىلداي الۋ وتە ماڭىزدى. بۇل ءومىرىڭىزدىڭ كوپتەگەن سالالارىنا اسەر ەتەدى. سوندىقتان كەمشىلىكتەرىڭىزگە عانا نازار اۋدارا بەرۋدى، ءوزىڭىزدى لايىقسىز دەن ساناۋدى دوعارۋعا ۋادە بەرىڭىز. ءوزىڭىزدى قالاي بار سولاي قابىلداڭىز، بۇل ءسىزدى تۇلعا رەتىندە ەرەكشە ەتەدى.
«ءجيى «ءيا» دەۋگە ۋادە بەرەمىن»
باسقالاردىڭ وتىنىشتەرىنە ەمەس، ءومىردىڭ مۇمكىندىكتەرىنە ءجيى «ءيا» دەۋگە تىرىسىڭىز. جاڭا نارسە ۇيرەنۋگە نەمەسە ۇمىتىلماس اسەر الۋعا مۇمكىندىك تۇسسە، «ءيا» دەۋگە قورىقپاڭىز.
«ءوزىمدى باسقالارمەن سالىستىرۋدى دوعارۋعا ۋادە بەرەمىن»
ەگەر الەۋمەتتىك جەلىنى ءجيى پايدالاناتىن ادامدار قاتارىندا بولساڭىز، ءوزىڭىزدى جانە ءومىرىڭىزدى باسقالارمەن سالىستىرۋ پروبلەماسى سىزگە دە تانىس بولار. باسقانىڭ ادەمى ءومىرىنىڭ ارتىندا نە تۇرعانىن بىلمەيسىز. ادامدار كوپشىلىككە ءومىرىنىڭ تەك جاقسى جاقتارىن كورسەتۋگە بەيىم. ءومىرىڭىزدى باسقالاردىكىمەن سالىستىرۋعا ۋاقىت قۇرتقانشا ەنەرگياڭىزدى جاقسى بولا تۇسۋگە جۇمساڭىز.
«باسقالاردى كىناراتتاۋدى دوعارۋعا ۋادە بەرەمىن»
سىزگە ۇنامايتىن نارسەنى كىناراتتاۋ وڭاي، ال ونى ءتۇسىنۋ جانە قابىلداۋ قيىن. بىرەۋلەردى ۇنەمى سىناپ، نەگاتيۆ تاراتقاننان ءوزىڭىزدى جاقسى سەزىنبەيسىز جانە ومىردەن ءلاززات المايسىز. ونىڭ ورنىنا ادامداردى تۇسىنۋگە تىرىسىڭىز. ەگەر تۇسىنە الماساڭىز، ولارعا جاعىمسىز نارسەلەر ايتۋدان اۋلاق بولىڭىز.
«مەيىرىمدى ىستەر جاساۋعا ۋادە بەرەمىن»
جاڭا جىلدا كەزدەيسوق مەيىرىمدى ىستەردى ءجيى جاساۋعا ۋادە بەرىڭىز. مىسالى، جاقىندارىڭىزعا جانە تانىمايتىن ادامدارعا قوشەمەت سوزدەر ايتۋ، مۇقتاجدارعا كومەكتەسۋ جانە ت. ب.
massaget.kz
